Klag teen ministers oor water

Die Nasionale Waterforum (NWF) beplan om Vrydag (7 Mei) minstens twee ministers strafregtelik aan te kla vir oortredings ingevolge die Nasionale Waterwet.

Luidens ‘n verklaring sê mnr. Louis Meintjes, voorsitter van die forum asook die ondervoorsitter van die TLU SA, hy meen die ministers moet aangekla word omdat hulle nie die Waterwet se bepalings uitvoer nie.  

Watter ministers word betrek?
Volgens Meintjes sal die aanklag onder meer teen me. Bulyewa Sonjica, Minister van Waterwese en Omgewingsake, me. Tina Joemat-Pettersson, Minister van Landbou, Bosbou en Visserye by die Brooklyn-polisiestasie in Pretoria ingehandig word.

Meintjes sê die kommersiële Suid-Afrikaanse boer is afhanklik van skoon water om voedselsekuriteit asook gesonde kos vir die land te voorsien.

“Dit is duidelik dat die ministers ter sprake, indien nie opsetlik nie, dan wel by versuim, nie uitvoering gee aan die bepalings van die Waterwet nie, en omdat ons geen reaksie van hulle kry na herhaaldelike aanmanings en vertoë in die saak nie, het ons geen keuse as om hulle strafregtelik aan te kla, te eis dat die saak ondersoek word en dat die skuldiges dan vervolg word nie.”

Moontlike verhoging van tot 43%
Intussen berig Fin24.com dat waterrade tariefverhogings van tussen 6,2% en 43% aan die portefeuljekomitee vir Waterwese in die Parlement voorgelê is. Dit volg nadat Sonjica verlede maand tydens haar begrotingsrede vir Waterwese gesê het dat geen watertariefverhogings in die pyplyn is nie.

Die verhogings sal na bewering munisipale tariewe vir water laat styg. Me. Linda Page, departementele woordvoerder, het glo in ‘n e-pos aan die Suid-Afrikaanse Mediavereniging gesê dat dié verhoging nie onreëlmatig is na Bulyewa se aankondiging nie. “Die verhoging wat waterrade voorstel is die normale jaarlikse verhogings wat aan die VPI verbind kan word.”

Landbou.com kon die afgelope twee weke nie reaksie van die department kry oor verskeie vrae in dié verband wat aan die minister gestel is nie.

4 Mei 2010