Klein Karoo-struktuur vorder

Die Klein Karoo-groep, met sy hoofkantoor op Oudtshoorn, vorder goed met die proses van herstrukturering wat reeds in 2002 deur lede goedgekeur is.

Klein Karoo International, die groep se volstruisonderneming, Klein Karoo Saad asook Klein Karoo Handel en Meganisasie sal voortaan as drie afsonderlike ondernemings bedryf word.
Volgens mnr. Kobus Goosen, hoof uitvoerende beampte van die groep, is ekonomiese oorwegings die rede vir die inwerkingstelling van die nuwe struktuur.

Hy sê dit is om in die toekoms die beste fokus in elk van die ondernemings te verseker. Lede van die Klein Karoo Koöperasie het die nuwe struktuur reeds in 2002 goedgekeur. Vanjaar het hulle weer gestem om verfyning en die inwerkingtreding van die nuwe struktuur, sê Goosen.

Die ondernemings sal elk 'n eie direksie en besturende direkteur hê. Klein Karoo International (Edms.) Bpk. en Klein Karoo Saad Beherend (Edms.) Bpk. is reeds sedert 2002 maatskappye, maar daar moet nog oor Klein Karoo Handel en Meganisasie se nuwe sakestruktuur besluit word.

Die herstrukturering skep geleenthede vir "goedgekeurde strategiese beleggers", wat met die nodige kundigheid, markte, navorsing en kennis strategiese waarde tot die maatskappye kan toevoeg, sê Goosen.

"Daar sal nie beperkings op aandeelhouding in die maatskappye wees nie. Klein Karoo Koöperasie sal altyd 'n opsie kan uitoefen wanneer enige aandele vir verhandeling beskikbaar raak. Die opsie sal oorweeg word voordat verkope toegestaan word."

Landbouweekblad, 26 September 2008