Klimaatmikpunte kan landbou knou

Suid-Afrika se mikpunte waartoe hy hom in 2009 by die Kopenhagen-klimaatsonderhandelings verbind het, was te hoog.

Dit kan die landbou se mededingendheid verder benadeel, sê dr. John Purchase, uitvoerende direkteur van die Landboubesigheidskamer.

Te ambisieus
Hy het op ’n nasionale konferensie oor klimaatsverandering in Pretoria gewaarsku dat die Regering se mikpunte te groot en te ambisieus is – veral in die afwesigheid van ’n internasionale ooreenkoms daaroor.

“Die private sektor is bekommerd dat die landbou en landbou-ondernemings in ’n nóg onmededingender posisie geplaas sal word. Die Suid-Afrikaanse landbou ding reeds op ’n ongelyke speelveld mee en ontvang van die minste regeringsteun ter wêreld.”

Die konferensie was ter voorbereiding van die Verenigde Nasies (VN) se reuseberaad oor klimaatsverandering later vanjaar in Durban. Tot 25 000 afgevaardigdes van bykans 200 lande wêreldwyd word vanaf 28 November vir die week lange byeenkoms van die VN-konvensie oor klimaatsverandering (UNFCCC) verwag.

Moeilike mikpunte
In Kopenhagen het Suid-Afrika hom daartoe verbind om sy kweekhuisgasvrystellings teen 2020 met 34% en teen 2025 met 43% te verminder. Purchase meen vir ’n ontwikkelende land sal dit baie moeilik wees om dié mikpunte te haal.

“Pogings om by klimaatsverandering aan te pas, moet berus op deeglike kennis en ’n gesonde ekonomiese grondslag. Die landbousektor is ten volle tot die proses verbind, maar die uniekheid van die bedryf moet ook erken word en die bedryf moet voorrangbehandeling ontvang.”

Purchase sê daar moet aansporings wees om aanpassings te maak en nie net na strafmaat reëls, soos belasting, gekyk word nie.

6 September 2011