Kom luister op Bien Donné

Insiggewende lesings, aangebied deur voorste landboukenners, sal vanjaar tydens die Bien Donné-ekspo gehou word. Standard Bank borg die program saam met Landbouweekblad.

Die program skop op Donderdag 1 November om 10:00 af met lesings oor alternatiewe vrugte vir die Wes-Kaap. Mnr. Bertie Smith van Standard Bank kyk onder meer na uitdagings in die landbou, terwyl mnr. Johan van Niekerk van Alternafruit oor alternatiewe vrugte sal praat. Me. Ester Lotz van die Landbounavorsingsraad (LNR) se Infruitec-Nietvoorbij-instituut vir Vrugte, Wingerd en Wyn sal uitdagings op landbougebied in die soeklig plaas. Daar sal ook aanbiedings oor bessievrugte, vye en granate wees.

Die beskikbaarheid van water
Ná middagete skuif die fokus na die beskikbaarheid van water vir die Wes-Kaapse landbou. Mnr. Bertrand van Zylvan die Departement van Waterwese en Bosbou sal inligting oor die provinsie se watervoorsieningstelsel, die inskakeling van die Bergrivier-projek asook toekomstige watervoorsieningstrategieë gee.

Klimaatsverandering sal deur mnr. Glen Roberts, 'n weerkundige by Enviromon, gedek word. Belangstellendes kan ook uitsien na aanbiedings oor die gehalte van water in die Bergrivier, die uitwerking van besproeiingswater op die landbou asook waterbesparing deur die landbousektor.

Volhoubaarheid
Op Vrydag 2 November sluit die lesings by een van die ekspo se oorhoofse temas aan, naamlik volhoubaarheid. Gesprekke oor volhoubare grondbestuur begin om 09:30 en duur tot middagete. Dr. Jan Jacobs van Humefert sal 'n oorsig oor dié onderwerp gee. Dr. Johan Fourie van die LNR sal oor dekgewasse in wingerde en boorde praat. Belangstellendes kan ook inligting oor mikro-organismes, kompos en toerusting vir volhoubaarheid kry.

Fynbos
Ná middagete val die kollig op fynbos. Me. Louisa Blomerus sal praat oor die LNR se navorsing op dié gebied. Die bemarking en verpakking van hierdie plante sal ook aandag kry.

• Die lesings word in die Agri-sentrum gehou. Dit kos R80 per persoon per dag, wat die ingangsgeld, drankies en ligte versnaperinge insluit. 'n Beperkte aantal kaartjies is beskikbaar en moet vooraf bespreek word.

  Landbouweekblad, 26 Oktober 2007