Kommer oor xenofobie ná sokker

Bewerings dat xenofobie moontlik ná die Wêreldbeker-sokkertoermooi kan kop uitsteek, word deur die intelligensiediens ondersoek, sê mnr. Nathi Mthethwa, Minister van Polisie.

Mthethwa sê hy is bewus van berigte in die media en uitsprake van menseregte-instansies oor vrese vir die herhaling van aanvalle wat in 2008 en 2009 voorgekom het. Veral plaaswerkers in die Wes-Kaap is gedurende aanvalle in 2009 bedreig.

Luidens ‘n verklaring verskaf inwoners in sekere dele van die land, waar baie buitelanders hulself bevind, glo ‘n wye reeks redes vir die moontlikheid van aanvalle. Mthethwa, wat ook die voorsitter van die interministeriële komitee vir xenofobie is, het enige moontlike rede vir dié geweld ten sterkste afgekeur.

“Ons sal nie enige dreigemente of geweld teen enige individu of enige groep van die samelewing duld nie. Dit maak nie saak wat die redes mag wees om dit te regverdig nie."

Die Regering monitor die dreigemente deur gesiglose misdadigers wat vrees wil veroorsaak. Ons wil die samelewing verseker dat die Polisie op die grond dié bose optrede sal aanspreek.” 

Verbeterde polisiëring sal voortgaan na toernooi
Mthethwa het vroeëre aankondigings, dat verbeterde polisiëring wat tydens die toernooi toegepas word na afloop van die toernooi sal voortgaan, weer beklemtoon.

“Veiligheidsagentskappe is op ‘n gereedheidsgrondslag om enige dreigemente of opvlamming van geweld teen enige individu of groep doeltreffend te hanteer. In die gees van samewerking, doen die Regering ‘n beroep op organisasies en individue wat moontlik inligting oor die dreigemente van xenofobiese geweld het, om dit aan die Polisie te verskaf,” vra Mthethwa.

Die komitee sal volgende week in Pretoria vergader om die situasie te bespreek. Die Ministers van Polisie, Behuising, Maatskaplike Ontwikkeling, Staatsveiligheid, Basiese Onderwys, Regeringsamewerking en Tradisionele Sake, Kuns en Kultuur asook Internasionale Verhoudinge en Samewerking sal aanwesig wees.

2 Julie 2010