Kopskuif vir agri-finansiëring

‘n Kopskuif is nodig in agri-finansiering, sodat die boer voordeel kan trek uit die waardeketting buite sy plaashek, sê Absa AgriBesigheid.

Dié sake-eenheid het Dinsdag (13 Julie) sy nuwe model vir finansiering, waardeketting-finansiering, in Centurion bekendgestel.

Mnr. Ernst Janovsky, hoofbestuurder van die eenheid, sê die bank wil wegbeweeg van die ou model van finansiering waar die fokus was op die individu en sy vermoë om geld te bestuur en terug te betaal. “Ons wil die boer se balansstaat ontsluit, en ook die kommoditeit en die waardeketting in ag neem wanneer finansiering bespreek word.”

Hoe werk dit?
Die doel agter dié finansiering is om ‘n meer holistiese benadering te volg ten opsigte van die landbou en die totale waardekettings wat daarby betrokke is. “Die bank sal dus waardeketting-finansiering doen met ‘n kommoditeit, soos ‘n gewas, as sekuriteit. Boere sal dus geld kan leen teen hulle bates én hulle produkte, nie nét hulle bates nie,” verduidelik Janovsky.

Dié finansieringsmodel word reeds in die volstruisbedryf gebruik, sê Janovsky. “Ons finansier die voer vir die volstruise terwyl ons weet later gaan vleis en sodoende geld daaruit voortspruit.” Die bank werk reeds die afgelope twee jaar aan dié model, aangesien die koste verbonde aan die verbouing van ‘n gewas ‘n boer se batewaarde verbysteek.

Met behulp van dié model kan die bank die boer ook met die beste kopers vir sy produkte in kontak bring.

Klik hier en kyk na 'n videogreep van Janovsky. Hy gesels oor waardeketting-finansiering.

14 Julie 2010