Kosproduksie moet verdubbel teen 2050

Om voedselsekuriteit in die toekoms te verseker moet kosproduksie teen 2050 wêreldwyd verdubbel, sê die Landboubesigheidskamer (LBK). 

“Volgens voorspellings moet voedselproduksie teen 2030 met 50% toeneem en teen 2050 verdubbel om voedselsekuriteit in die wêreld te verseker,” sê mnr. John Purchase, uitvoerende hoof van die LBK.

Die LBK en die Nuwe Vennootskap vir Afrika se Ontwikkeling (Nepad) se Sakestigting het ‘n vergadering in Pretoria gehou waartydens die bevordering van die betrokkenheid van landbou-ondernemings en Afrika-regerings by voedselsekuriteit bespreek is.

“Volgens Amerikaanse navorsing is slegs een van die 14 groot gewasse wat tans wêreldwyd aangeplant word se vordering rakende voedselsekuriteit tans op datum om teen 2050 produksie te verdubbel,” sê me. Susan Sechler, woordvoerder vir die Hewlett Foundation in Amerika. Sy was ‘n spreker by die vergadering.

Hoe lyk dit in Suid-Afrika? 
Purchase sê Suid-Afrika se nasionale voedselsekuriteit is tans op standaard, maar huishoudelike voedselsekuriteit is ‘n bron van kommer.

“Ons het genoeg voedsel in die land. Ons sit met ‘n reuse oorskot van mielies, wat ons nie weet wat om mee te doen nie. Die probleem kom in by huishoudings wat nie die geld het om dié voedsel te koop nie.”

Volgens mnr. Mark du Plessis, uitvoerende hoof van Aartappel SA, vaar die produksie van aartappels en patats in Afrika baie goed. “In Afrika is daar slegs twee gewasse wat goed vaar met verhoogde produksie. Aartappels en patats is die enigste twee gewasse waarvan die produksie die afgelope drie jaar verdubbel het.”

Ondersteuning aan sektor in Afrika
Volgens Sechler gaan die Amerikaanse regering ondersteuning aan Afrika op verskeie vlakke bied vir voedselsekuriteit.

“Grootskaalse ondersteuning aan die landbou en veral kleinboere word beplan. Een van die grootste uitdagings in die proses en in Afrika is dat mense net doen wat hulle weet wat om te doen, nie wat hulle veronderstel is om te doen nie,” vertel sy.

Sechler sê beplanning is tans aan die gang, en daar is hoop dat dié prosesse suksesvol toegepas gaan word.

23 April 2010