Koste hou kunsmis uit Afrika

Hoewel daar dikwels kritiek oor die beskikbaarheid en koste van kunsmis in Afrika is, word die ekonomiese risiko om sake in sekere Afrika-lande te doen, nie besef nie, sê mnr. Gavin Brimacombe, direkteur van Omnia.

Hy het tydens die landboubesigheidsforum op Somerset-Wes gesê die feit dat kunsmistoediening in Afrika gemiddeld 10 kg/ha is, teenoor 100 kg/ha in die res van die wêreld, word dikwels aan onvoldoende kunsmisvoorsiening en duur kunsmis toegeskryf. Hy glo egter dat regerings in Afrika nie alle faktore wat die beskikbaarheid van kunsmis bepaal begryp nie en boonop nie genoeg doen om besigheidsrisiko te verlaag nie.

"Die prys waarteen kunsmis verkoop word, moet die risiko en verwante koste weerspieël en die ondernemer daarvoor vergoed. Maar regverdig die prys van kunsmis in Afrika regtig die moeite wat kunsmishandelaars doen?" het Brimacombe gevra.

Brimacombe sê regeringsbeleid en regerings se vermoë om dit betekenisvol toe te pas is van uiterste belang. "As ons die beskikbaarheid van kunsmis wil verbeter en die prys verlaag, moet ons begin om die risiko, en dus die koste, van besigheid in Afrika te verlaag."

17 Junie 2009