Kritiek op plaasskole se agteruitgang

In 'n ondersoek oor toestande by Suid-Afrikaanse plaasskole deur die Amerikaanse organisasie, Human Rights Watch, word die Regering daarvan beskuldig dat hy skole op plase verwaarloos en duisende kinders gevolglik nie geskikte onderrig ontvang nie.

Volgens dié verslag veroorsaak die Regering se onvermoë om kontrakte met grondeienaars te beding dat kinders se reg tot basiese onderrig ontneem word. Ingevolge wetgewing moet die lewering van belangrike dienste in kontrakte tussen die staat en grondeienaars bepaal word.

Die Departement van Onderwys, wat die ondersoek verwelkom het, sê van die probleme wat die ondertekening van ooreenkomste tussen boere en provinsiale onderwysdepartemente belemmer, is weerstand onder boere weens verskillende redes (wat politiek insluit), onsekerheid oor die eienaarskap van grond waarop die skole is en probleme om inligting te bekom oor grondeienaars wat reeds dood is.

Die departement sê teen einde verlede jaar was 1 835 ooreenkomste vir 4 188 plaasskole reeds gesluit. Volgens inligting was daar nog net twee gevalle waar ooreenkomste met eienaars nie bereik kon word nie.

Die departement sê in 'n verklaring sy grootste kommer is nie net die ondertekening van ooreenkomste nie, maar die gehalte van onderrig in van die skole. Dit hou verband met 'n gebrek aan hulpbronne, die tekort aan opgeleide onderwysers wat in landelike gebiede wil werk, vervoer en die verskaffing van dienste soos water en sanitasie.

'n Taakspan is in Februarie aangestel om onderrig in landelike gebied te ondersoek en 'n verslag word teen November verwag.