' KWV kan in verkeerde hande beland'

Kommer bestaan dat die KWV se netto batewaarde groter is as wat aangedui word, dat dit tot 'n vyandige oorname-aanbod kan lei en dat die vangnette onvoldoende is om hom daarteen te beskerm.

Mnr. Danie Joubert van Wellington, wat vir die KWV-direksie 'n bron van irritasie geword het, maan dat wynboere moet sorg dat hulle nie in dieselfde situasie as melkboere beland nie. "Ek wil nie 'n doemprofeet wees nie, maar hoe kan wynboere toelaat dat met hul toekoms gedobbel word?"

Waarnemers buite die KWV-kamp wys daarop dat die suiwel- en die wynbedryf nie vergelykbaar is nie. Die suiwelbedryf het nie 'n Distell gehad nie. Sou die KWV verdwyn, kan Distell wynboere se distilleer- en rabatwyn koop.

Op sy beurt sê die KWV in 'n nuusvrystelling sy huidige netto batewaarde is R2,50 per aandeel. Sedert begin Oktober het sy aandeelprys gestyg van net sowat R1,00 per aandeel tot ongeveer R1,60.

"Daarom kan die KWV 'n teiken vir batestropers wees wat die maatskappy spotgoedkoop wil koop, die bates vir 'n groot wins verkoop en die maatskappy dan likwideer." Wynboere kán dus blootgestel word aan 'n mark sonder enige mededinging, terwyl die minderheidsaandeelhouers nie in die batestroping se opbrengste sal deel nie. Volgens die KWV kan dit die mark tot nadeel van alle deelnemers ontwrig.

Om 'n vyandige oorname-aanbod te probeer fnuik, kry KWV Koöperatief (wat ná die KWV se voorgestelde herstrukturering waarskynlik as Wijngaard bekend sal staan) dus 'n voorwaardelike opsie om die KWV se belangrikste bate, naamlik sy brandewynvoorraad, teen die huidige belastingwaarde te koop.

Dit sal geld indien 'n oorname-aanbod vir die KWV se aandele gemaak word teen minder as 80 % van die maatskappy se heersende netto batewaarde. Wijngaard sal verder die reg hê om dieselfde voorraad teen vervangingswaarde aan die maatskappy terug te verkoop.

Dié vangnet verval ná vier jaar of sodra die voorraad uitverkoop is. Dié opsie sal nie uitgeoefen kan word sodra 'n aanbod teen hoër as 80 % van die netto batewaarde (tans R1,97/aandeel) gemaak word nie.

Mnr. Joubert meen ander wynlande wat rakspasie in oorsese supermarkte verloor het, kan belang stel om die KWV oor te neem om hul eie posisie te verbeter. Boonop sal só 'n oorname gepaardgaan met die verkryging van 'n belang van bykans 20 % in Distell.

Hy sê die KWV se intrinsieke waarde is sowat drie maal meer as wat tans aangedui word. Mnr. Joubert sê die KWV-direksie weier om 'n paar baie belangrike vrae van hom te antwoord.