KWV oorgehaal vir sake doen

KWV Beperk beplan om waarde te ontsluit deur die beleggingsy van sy operasionele sy te skei en aandeelhouers 'n belang in albei die "nuwe" maatskappye te gee.

Mnr. Thys Loubser, hoof uitvoerende beampte van KWV Bpk., sê die herstrukturering van die maatskappy beteken dat KWV Suid-Afrika, die wynproduksie en -bemarkingsy van KWV Bpk., en die genoteerde beleggingsy, KWV Beleggings, geskei gaan word.

Dit bied 'n geleentheid om op die afsonderlike entiteite te fokus en 'n geleentheid om dié wat gereeld kritiek uitspreek teenoor die groot deel van sy wins wat KWV jaarliks van Distell, 'n mededinger-wynmaatskappy, ontvang, verkeerd te bewys deur sukses te behaal sonder die hulp van Distell.

KWV Beleggings besit 50 % van die aandele in Remgro-KWV Beleggings wat 59,88 % van die aandele in Distell hou. KWV se bates is sowat R2,8 miljard werd. Die helfte daarvan is sy belegging in Distell.

"Ons ontbondel om waarde te ontsluit. Dit gaan net voordele inhou en 'n stimulus aan aandeelhouers verskaf," glo Loubser.

Uitdagende tyd lê voor
Loubser erken daar wag 'n uitdagende tyd op hulle. KWV Beperk het vir jare "gewoond" geraak aan 'n jaarlikse kontant-inspuiting in die vorm van 'n dividend van Distell. In die ses maande tot Desember 2008 was die inkomste uit hul belegging in Distell R192,6 miljoen. Loubser sê hulle besef hulle sal voortaan na die finansiering van KWV moet omsien. "Ons gee (met ontbondeling) 'n enorme bate af wat vir 'n kontantstroom gesorg het, en ons het R90,2 miljoen belê deur nog aandele in KWV Beleggings, en dus Distell, daarin te koop."

Notering op die JSE is een van die bronne van befondsing wat hulle oorweeg, maar dis nie die eerste bron nie. Daar is ander bronne wat hulle eers sal oorweeg, soos byvoorbeeld die verkoop van bates wat nie by hul strategie inpas nie. Loubser sê hulle sal beslis KWV-bates, soos eiendom en hul brandewynvoorraad, met 'n berekende oog oorweeg vir die mate waartoe hulle tot die maatskappy se strategie bydra.

KWV Beperk se finansiële resultate vir die halfjaar geëindig Desember 2008, met die resultate vir die ooreenstemmende tyd in 2007 in hakies, is:

• Totale bates: R2,8 miljard (R2,9 miljard).
• Omset: R 441,6 miljoen (R447 miljoen).
• Bedryfswins: R26,7 miljoen (R40,5 miljoen).
• Netto kontantvloei uit bedryfsaktiwiteite: R26,3 miljoen (R47,3 miljoen).
• Inkomste van geassosieerde bedrywe, bv. Distell: R192,6 miljoen (R163 miljoen).
• Netto wins uit voortgesette aktiwiteite: R196,7 miljoen (R178,8 miljoen).

  31 Maart 2009