KWV-storm uitgewoed

Die enigste stof wat op verlede week se spesiale ledevergadering van KWV Koöperatief Bpk. op Worcester opgeskop is, was toe mnr. Tienie Malan van Wellington 'n vraagteken op die toekoms van die KWV se kwekerydiens geplaas het. Daarna is die herstrukturering van die KWV-groep met 'n stemmeerderheid van 85 % goedgekeur.

Dit het 'n einde gebring aan die afgelope paar maande se stormagtige debat oor die KWV se toekoms en finaal die weg gebaan vir die groep om van Januarie aanstaande jaar sy herstruktureringsplan in werking te stel. Die KWV word verdeel in 'n maatskappy en in 'n koöperasie, genaamd Wijngaard Koöperatief.

Mnr. Lourens Jonker, wat op die vergadering as die direksievoorsitter van KWV Koöperatief uitgetree het, het gesê die KWV-skip het tot dusver in die hawe gelê. Die skip is egter nou gereed om die internasionale waters aan te durf.

" 'n Paar paniekbevange mense wou ons laat omdraai. Hulle skiet na die bemanning en vra dat ons eers 'n waardebepaling van die vrag moet doen. Geen skip kan egter sy reis voltooi deur in die hawe te bly nie. Met die regte struktuur kan ons nou as boere en as 'n maatskappy die wêreldmarkte met mening takel.&quot

Mnr. Danie de Wet het hulde gebring aan mnr. Jonker se besondere leiereienskappe en hom bedank vir sy bydrae tot die wynbedryf die afgelope 20 jaar.

Mnr. Jonker is intussen op die eerste direksievergadering van KWV Bpk. as voorsitter en mnr. De Wet as ondervoorsitter aangewys. Wijngaard Koöperatief het mnr. De Wet (Robertson) as sy eerste voorsitter en mnr. Johann Krige (Stellenbosch) as die ondervoorsitter aangewys.

Benewens dié lede bestaan Wijngaard se direksie uit mnre. Abrie Botha (Olifantsrivier), Koos Burger (Oranjerivier), Willie Hewett (Malmesbury), Pieter Hugo (Rawsonville), Jannie le Roux (Paarl), Neil Nell (Klein Karoo) en me. Sharon February (benoemde lid).

13 Desember 2002