KWV teken groot verlies aan

Een van Suid-Afrika se wynreuse, KWV, het ’n verlies van R53 miljoen aangeteken in sy afgelope boekjaar wat op 30 Junie vanjaar geeïndig het.

Luidens ’n berig op Sake24.com was die KWV se bedryfsvertoning tydens die eerste ses maande van die boekjaar reeds onder druk.

Volgens ’n verklaring wat die direksie uitgereik het, word die verlies toegeskryf aan “die uitwerking van uitdagende markte en omdat die direksie en bestuur se aandag deur korporatiewe aksie afgelei is’’.

Pioneer Food
Die direksie sê die situasie met die aanbod wat Pioneer Food in dié tydperk gemaak het, het die maatskappy R6 miljoen gekos ten spyte daarvan dat die aanbod deur die aandeelhouers verwerp is. 

Dié koste is aangegaan vir adviesdienste. “Die onderhandelings in moeilike handelstoestande het die bestuur se fokus benadeel.”

Die maatskappy se omset het met 7% afgeneem teenoor die vorige boekjaar. Dit kan hoofsaaklik toegeskryf word aan ’n afname in verkoopsvolumes en die mengsel van produkte wat verkoop is.

Brandewyn
Die maatskappy sê hy het wel sy verkope in die plaaslike brandewynmark uitgebrei, al het die mark gekrimp. Verkope van KWV se 3 jaar, 5 jaar, 10 jaar, 15 jaar en 20 jaar oue brandewyn het in die boekjaar met 10% toegeneem vergeleke met die vorige boekjaar.

“Die KWV is in ’n goeie posisie wat sy kontantreserwes betref en het ’n gesonde balansstaat wat hom in staat stel om die verliessituasie te deurstaan,” lui die verklaring.

’n Ingrypende kostebesparings- en sakeverbeteringsprogram is tans by die maatskappy aan die gang. Die vakante pos van uitvoerende hoof is ook onder bespreking.

Bron: Sake24.com

1 September 2011