KWV-twis in die kollig

In die wynbedryf is alle oë vandeesweek op KWV Koöperatief Bpk. se jaarvergadering gerig om te sien hoe die direksie die groeiende meningsverskil oor die KWV Groep se voorgenome omvorming gaan hanteer.

Teen druktyd is verwag dat mnr. Danie Joubert, 'n wynboer en een van die KWV se A-aandeelhouers, asook die organisasie Montagu Jongboere alles in die stryd sou werp om besluite oor die KWV se omvorming met drie maande, of selfs langer as 'n jaar, te vertraag. Die Montagu Jongboere het die KWV-direksie verlede week daarvan beskuldig dat hy alternatiewe voorstelle gevra het, maar dit toe geïgnoreer het.

In teenstelling met dié wrywing was die algemene verwagting teen druktyd dat die KWV-direksie en die sogenaamde Groep van Vyf nader aan mekaar beweeg het en dat hulle 'n kompromisvoorstel sou aankondig. Só 'n voorstel sal egter nie vandeesweek tot stemming gebring kan word nie, omdat die Maatskappywet bepaal dat dit 14 dae voor die stemdag gesirkuleer moet word.

Nog 'n verwagting was dat die KWV-direksie die aandeelhouers op die jaarvergadering vra om hom te vertrou om verder met die Groep van Vyf te onderhandel, sodat net een voorstel op die jaarvergadering van die KWV Groep op 27 November kan dien.

'n Verdere moontlikheid was dat die Groep van Vyf by die direksie se voorstel sou inval, in welke geval die voorstel vandeesweek tot stemming gebring sal kan word. Vir die jaarvergadering van die koöperasie is 'n kworum van slegs 66 mense of 66 volmagte nodig, terwyl 'n meerderheid van twee derdes nodig is om een van die omvormingsvoorstelle goed te keur. Om dit op die jaarvergadering van die KWV Groep goedgekeur te kry, word 'n meerderheid van 75 % benodig.

Die Montagu Jongboere het verlede week gesê die spoed waarmee die KWV-direksie alles wil deurdruk, maak hom onrustig.

Die omvorming het ten doel om die KWV Koöperatief van die maatskappy te skei, sodat die maatskappy sy volle potensiaal kan bereik. Wynboere vrees egter dat hulle hul beheer oor die maatskappy sal verloor en dat hulle nie behoorlik daarvoor vergoed sal word nie. Hulle meen ook dat die koöperasie gesond en kragtig moet bly om as produsente-organisasie vir hulle te kan voortbestaan.