'n Totale maansverduistering en 'n kopermaan vind Woensdag (15 Junie) plaas voor dit eers weer in 2015 sal gebeur.

Dr. Enrico Olivier, ‘n verteenwoordiger van die Suid-Afrikaanse Astronomiese Observatorium (SAAO), sê vanaf 20:20 sal die maan in die aarde se skaduwee inbeweeg en dit sal geleidelik donker word.

“Teen 21:22 sal die maan heeltemal donker wees en die oppervlak van die maan sal ‘n rooierige koperkleur hê. Teen 23:03 sal die maan weer uit die aarde se skaduwee beweeg en stelselmatig weer sigbaar word,” aldus Olivier.

Volgende verduistering
Olivier moedig Suid-Afrikaners aan om nie dié verskynsel mis te loop nie, aangesien die volgende totale maansverduistering eers in September 2015 kan plaasvind. Die vorige volle verduistering was in 2008.

Olivier sê die maan sal koperrooi vertoon omdat baie van die blou lig in die aarde se atmosfeer weens die beweging van die maan verwyder sal word en basies net die rooi lig van die son af op die maan sal skyn.

14 Junie 2011