KZN-plaasmoord eis drie lewens

Drie mense van die plaas Sherwood Farm buite Mooirivier in KwaZulu-Natal is in ‘n plaasaanval vermoor. Luidens ‘n berig op News24 het die aanvallers die boer se aandag afgetrek deur ‘n brand te stig.

Die eienaar van die plaas se vrou en twee werkers is vermoor in die geskarrel om die brand te blus. Die aanvallers het volgens kol. Jay Naicker, woordvoerder vir die Polisie, te voet op die vlug geslaan.

‘n Polisiehond en offisiere het tot laat Woensdagnag (21 Julie) na die aanvallers gesoek. Boere in die omgewing het ook paaie afgesper om die aanvallers aan te keer. Die KwaZulu-Natalse Landbou-unie (Kwanalu) het sy skok uitgespreek oor die aanval.

Mnr. Koos Marais van dié unie meen die aanvallers wou die plaas beroof, maar is onderbreek. Hy voeg by dat daar reeds 18 plaasaanvalle en drie plaasmoorde in die provinsie voorgekom het vanjaar, die bogenoemde geval uitgesluit. Volgens Naicker is die rede vir die aanval twyfelagtig aangesien niks gesteel is nie.

Bron:
News24.com

22 Julie 2010