Lancewood sny melk met 70 000 liter

Lancewood, ‘n suiwelmaatskappy met hoofkantoor in George, het besluit om sy inname vir melk met laer vastetof-inhoud met 70 000 liter per dag sny.

Mnr. Leon Conradie, ‘n onafhanklike raadgewer van dié maatskappy, sê dié besluit geld vanaf 1 Oktober 2010.

Conradie sê weens die oorproduksie in die mark en Lancewood se posisie, moes hy kaasproduksie terugsny en het hul kriteria daarvoor die stap vasgestel. “Ons het besluit om die produksie van melk met laer vastestof-inhoud met tussen 70 000 tot 80 000 liter per dag terug te sny.”

Hy sê weens die ooraanbod is die maatskappy veral nie in staat om dieselfde volume kaas te verkoop nie, en ook nie teen dieselfde prys nie. “Daar is ook boere wat met ‘n ooraanbod kaas sit, wat hulle teen pryse verkoop wat laer is as wat ons sou wou sien.”

Glyskaal is gebruik
Volgens Conradie is ‘n glyskaal gebruik om vas te stel watter melkstalle se produksie te sny.

Die maatskappy het ook onlangs sy produsente in die Tsitsikamma-omgewing in kennis gestel dat die winterpremie wat betaal is, aan die einde van Julie verval. “Dit beteken dat dié produsente dan 25c/liter minder vir hulle melk gaan ontvang. Die winterpremie was egter niks anders as ‘n tydelike reëling met produsente nie.”

Conradie sê die maatskappy het in Junie vanjaar sy pryse aan produsente met 30c/liter verlaag, en dieselfde verlaging is ook vanaf 1 Julie ingestel. Dit beteken ‘n 60c/liter verlaging is ingestel oor twee maande.

MPO beskou dit as ‘jammerlik’
Intussen sê mnr.Dèan Kleynhans, voorsitter van die Melkprodusente-organisasie: “Dit is ‘n jammerlike dag dat dit moes gebeur. En dit is jammer dat die produsente net drie maande kennis kry.”

Volgens Kleynhans word vyf produsente, waarvan vier MPO-lede is, deur dié aankondiging geraak. “Van dié produsente se produksie vind net 25km van Lancewood af plaas, dit is nie eers ver nie. Ja, ons verstaan daar is sakebelange hieragter, maar dit kan tog nie die oorwegende rol in die besluit speel nie?”

“Ons sit met ‘n baie groot probleem as dit die vlak is waartoe sake-etiek in die land gedaal het,” het Kleynhans opgemerk.

Lees ook: Tydbom gaan bars in melkbedryf

5 Julie 2010