Land Bank ontken moratorium

Gerugte van ‘n nuwe Land Bank-moratorium op die invordering van opkomende boere se skuld is deur mnr. Wolf Meyer, die bank se finansiële hoof, ontken.

Meyer sê daar is ‘n tydelike vertraging in die regsproses rondom opkomende boere, maar dit hou verband met die implementering van die regering se reddingspakket vir die boere en is nie ‘n moratorium nie.

Nes wit boere moet hul dus steeds hul skuld delg. “ ‘n Streng invorderingsprogram is aan die gang en die bank het reeds op beide kommersiële en opkomende boere se eiendom beslag gelê.” Mnr. Phakamani Hadebe, uitvoerende hoof van die bank, het die vorige moratorium gelig toe hy die bank se leisels in 2008 opgetel het. “Dis teen die Wet op die Bestuur van Openbare Finansies (PFMA) om nie lenings in te vorder nie.”

Mnr. Dirk Hermann , adjunk-uitvoerende beampte van Solidariteit, sê egter dit lyk of slegs wit skuldenaars moet betaal. “Dit wil tóg voorkom of daar weer ‘n tipe moratorium op die invordering van opkomende boere se agterstallige skuld geplaas is.”

Hermann skoei sy uitspraak op ‘n brief wat mnr. Jerome Mthembu, regshoof van die Land Bank, aan Solidariteit se Instituut vir Grond, gestuur het. Die sloerende regsaksie is volgens Mthembu die resultaat van versoeke deur beide die parlementêre portefeuljekomitee vir landbou en die Departement van Landbou, Bosbou en Visserye.

Lees meer in Landbouweekblad se uitgawe van 15 Januarie 2010.

8 Januarie 2010