Land Bank-wins skiet op

Die Land Bank se wins van R354 miljoen is R200 miljoen hoër as in die vorige boekjaar. Die bank het vir die tweede opeenvolgende jaar ‘n ongekwalifiseerde ouditverslag ontvang.

Volgens die bank se verslag vir die 2009/’10 boekjaar het sy totale wins van R145 miljoen in die 2008/’09 boekjaar tot R354 miljoen gestyg.

Mnr. Wolf Meyer, die hoof finansiële beampte, sê die wins van die versekeringsafdeling het van ‘n verlies van R74 miljoen in die vorige jaar tot R162 miljoen gestyg. Winste by die bankwese-afdeling het egter gedaal van R220 miljoen tot R193 miljoen.

“Nog op medikasie”
Mnr. Pakamani Hadebe, die hoof uitvoerende beampte, sê hoewel hy baie trots is op die groei wat die bank die afgelope 18 maande getoon het, is alles nog nie op standaard nie.

“Net nadat die Minister my aangestel het, het hy gesê die bank se toestand is só kritiek, dis in die intensiewe eenheid van die hospitaal. Ná die eerste finansiële verslag het ons na ‘n gewone saal geskuif. Nou is ons ontslaan, maar ons is steeds op medikasie,” sê Hadebe.

Die bank se mandaat bepaal dat hy die Regering se pogings om toegang tot grond te verbeter, moet ondersteun. Verdere doelwitte is om opkomende boere te ondersteun en landelike ontwikkeling te bevoordeel. Hadebe erken dat die bank tans nie op dié terreine presteer nie.

“Dit is van kritieke belang dat die bank aan dié doelwitte voldoen en aan ons kredietwaardigheid bou, want die bank se geskiedenis het sy beeld skade berokken. Ons het aan ons kredietwaardigheid gebou die afgelope 18 maande, en ek dink ons kan daarop trots wees.”

Ondersoeke by die bank
Hadebe sê hoewel die verskeie ondersoeke na onreëlmatighede en korrupsie by die bank vorder, is dit ‘n tydsame proses. Die SA Polisiediens verwag glo om binnekort nóg arrestasies te maak.

‘n Ondersoek na 210 bankrekeninge waarbinne onreëlmatighede voorgekom het gaan nog ‘n paar maande duur, en Hadebe sê die ondersoek na forensiese elektronika sloer. “Ons kyk tans na prosesse om die ondersoek te versnel.”

Hy sê die ondersoeke na die elektroniese oorbetaling van geld in amptenare se rekeninge bring groot uitdagings mee. “Witboordjie-misdaad kan nie so maklik opgelos word soos die steel van ‘n item in ‘n winkel nie. Dit is baie frustrerend want hoewel mens die spoor kan volg van hoe geld in bankrekenings oorbetaal is, sê die regsverteenwoordigers dit is nie voldoende bewyse nie. Ons sal baie bly wees as dié mense wat geld gesteel het - wat vir gewone Suid-Afrikaners aangewend moes word - agter tralies sit!”

Hadebe is 18 maande gelede as die agtste hoof uitvoerende beampte in drie jaar by die bank aangestel. Hy sê met sy aanstelling was sowat 530 werknemers in die bank se diens waarvan hy 40 afgedank het weens onreëlmatighede. “Meeste van dié was uitvoerende beamptes. Die bank het sedertdien nege nuwe uitvoerende beamptes aangestel.”

Hadebe is hoopvol dat die bank sal herstel. “Ons sal net onsself kan blameer as ons onsuksesvol is!”

19 Augustus 2010