Landbou in Afrika ‘uiteindelik erken’

Ten einde laaste begin lande in Afrika die landbou sy regmatige plek in die son gee, sê mnr. Paul Runge, ’n konsultant vir ondernemings wat in Afrika wil belê.

Runge het op die landbounetwerk-organisasie Agrifica se konferensie oor landbousakebedrywighede in Afrika gesê die talle groot landbouprojekte wat in Afrika suid van die Sahara aan die gang is en die talle uitnodigings aan Suid-Afrikaanse boere om hulle te hervestig, bewys dat regerings ernstig raak oor landbou-ontwikkeling.

“Daar is ongetwyfeld ’n prolandbou-sentiment, maar dit is ongelukkig nie al wat nodig is nie. Die belangrikste aspek is die implementering van projekte.”

Finansiering benodig
Runge, wie se onderneming 80 maatskappye in Afrika bystaan, sê die twee belangrikste faktore om Afrika-projekte in suksesvolle saketransaksies te omskep, is finansiering en logistiek.

“ ’n Projek sonder geld bly net ’n stuk papier. Wat my kwel, is die gebrek aan kennis in Suid-Afrika, en veral binne die landbou, oor die ontwikkelingsfinansiering wat wel beskikbaar is.

"Die skerp styging in internasionale pryse van landbou-kommoditeite veroorsaak dat die hele wêreld in Afrika wil belê. Soms wil dit voorkom of Suid-Afrikaners verkies om net op die kantlyn te staan en kyk. Ons as Suid-Afrikaners sal met mekaar moet begin praat en ons kennis uitruil.”

Beleid kwel
Mnr. Rod Gravelet-Blondin, senior hoofbestuurder van Safex, het gesê die JSE se landbouafdeling stel baie belang om in Afrika betrokke te raak, maar een van die groot struikelblokke is die gebrek aan beleid wat prysrisiko bekamp.

“Dit beteken nie elke land in Afrika hoef sy eie mark vir afgeleide instrumente te hê nie, maar die landbou in Afrika moet toegang hê tot instellings waarmee prysrisiko’s bestuur kan word.”

2 Augustus 2011