Landbou kry 12

Die georganiseerde landbou het die bykomende droogtehulp van R250 miljoen verwelkom wat verlede week deur die Kabinet aangekondig is. Belanghebbendes is egter teleurgesteld dat die landbou met die minste tevrede moet wees. Die landbou staan agter in die ry van departemente wat vir dié droogtehulp in aanmerking kom.

Die landbou kry R30 miljoen (12 %) van die totale bedrag, hoofsaaklik vir voeraankope vir vee. 'n Totaal van R125 miljoen is toegeken vir watervoorsiening aan mense en diere waar dit nodig is, R60 miljoen gaan na maatskaplike ontwikkeling vir kosvoorsiening aan behoeftiges en R35 miljoen gaan na die Departement van Gesondheid om te help in die bestryding van siektes, soos cholera, wat weens die droogte 'n gevaar is.

'n Bykomende R500 miljoen is, onderhewig aan hersiening, vir die komende twee finansiële jare opsy gesit, sê mnr. Xolani Xundu, woordvoerder van die Departement van Provinsiale en Plaaslike Regering wat ramphulp koördineer.

Lede van die Kabinet is bekommerd oor die komende winter omdat die getal mense wat hulp nodig het waarskynlik gaan toeneem. Dit is in berekening gebring by die bedrag van R500 miljoen vir hulp in die volgende twee finansiële jare.

Dit geld hulp vir voedselvoorsiening, sowel as mense wat gevaar staan om hul werk weens die droogte te verloor.

Volgens Xundu sal dié geld ook gebruik word om vroeë waarskuwingsvermoë te ontwikkel wat veral volhoubare landbouherstel sal verseker om afhanklikheid van hulp op lang termyn te vermy.

'n Goeie balans in die verdeling van geld vir droogtehulp is nodig om te verhoed dat die kommersiële landbou dink dat hy nie op die steun van die Regering kan staatmaak nie, sê mnr. Japie Grobler, voorsitter van Agri SA.

Mnr. Paul van der Walt, voorsitter van die TLU SA, sê die ekonomie van die landbou moet na behore in ag geneem word om dit te help om te oorleef.

"Die nood in die landbou is groot en daar moet seker gemaak word dat die geld daar gebruik sal word waar dit die beste vir die hele land sal wees en nie net om sosiaal-ekonomiese probleme op te los nie. As die landbou gehelp word, word die hele ekonomie gehelp."