Landbou se PPI-syfer ‘tel kop op’

Die produksieprysindeks (PPI)-syfer vir die landbou het met 1,2% tussen Julie en Augustus vanjaar gestyg, maar groter stygings is nodig, sê ekonome.

Volgens Statistieke SA het die algemene PPI vir Augustus op 7,8% te staan gekom, terwyl dit 9,4% in Julie was. Die verbruikersprysindeks (VPI)-syfer vir Augustus is 3,5%.

Wat die landbousektor aanbetref is ‘n styging van 1,2% aangeteken ná Julie se syfer van 0,2%, en Augustus op 1,4% te staan gekom het.

Me. Lindie Stroebel, bestuurder van ekonomiese intelligensie en finansies by die Landboubesigheidskamer, meen die syfer is hoër omdat landboupryse ‘n bietjie gestyg het weens die droogte in Rusland en Oos-Europa. Sy sê die tekorte aan groente, wat teweeg gebring is deur die rypskade wat vroeër vanjaar veral in Limpopo aangerig het, was ook ‘n bydraende faktor.

Geen verrassing
Stroebel sê na aanleiding van dié faktore is sy nie verbaas dat die syfer gestyg het nie. Sy meen die sterk rand is ook tans die rede vir goedkoop invoere, wat inflasie laag hou en die koste van produksie laat daal. “Ons gaan egter die voordeel hiervan eers in die opkomende seisoen voel.”

Wat die styging aanbetref sê Stroebel: “Dis, myns insiens, nog steeds te min. Die styging in koste van produksie is steeds groter as die vermeerdering in die PPI, wat steeds aandui dat boere en landbou-ondernemings nog nie die einde van die kontantvloeiprobleem in die sektor gesien het nie.”

Komende maande
Stroebel verwag nie dat die PPI-syfers vir die landbou in die komende maande veel meer gaan styg nie, maar dat dit eerder op dieselfde vlakke sal bly. Sy meen wel dat die koste van produksie ietwat kan verlaag weens goedkoper invoere, wat die druk op kontantvloei in die volgende produksieseisoen tot ‘n mate kan verlig.

“Alhoewel ons hoër pryse vir die landbou nodig het, gaan ons druk kry van verbruikers wat meer betaal vir kos en minder vir ander goedere. Die landbou gaan ook sukkel om mee te ding teen goedkoper landbouprodukte wat ons mark kan binnekom. Die kontantvloeidruk is sleg, maar dis veel erger as ons ons markte verloor deur goedkoop invoere. Ons Regering het ook heeltemal te min strukture in plek om die landbou in sulke posisies te ondersteun,” verduidelik Stroebel.

5 Oktober 2010