Landbou sentraal in nuwe groeiplan

Die ontwikkeling van die landbousektor is sentraal in die land se nuwe ekonomiese groeiplan, wat beteken dat daar nou meer geld in die sektor gestoot gaan word.

Die Regering wil die ekonomiese potensiaal van ses sektore ontsluit met die ontwikkeling van infrastruktuur as hoof-prioriteit, waarin die vervoerstelsel, energie, water, kommunikasie en behuising onder meer aandag sal kry. Die landbousektor is die tweede mees belangrike sektor waarna gekyk sal word.

Daar sal veral na die waardeketting, met fokus op die uitbreiding van plaasuitsette, werkskepping en landbouverwerking, gekyk word. Verder sal die mynbou, die groen ekonomie, die vervaardigingsektor en toerisme aandag geniet.

Die groeiplan dien as die basis vir die gekoördineerde beleide en programme regoor alle dienste van die staat. Die hoop is om vyf miljoen werkposte in die volgende 10 jaar te skep om die land se werkloosheidsyfer van 25% na 15% te verminder.

Wat sê Tina?
Me. Tina Joemat-Pettersson, Minister van Landbou, Bosbou en Visserye, het gesê die landbou kan nie in ‘n vakuum transformeer nie. Sy meen transformasie moet binne dié van die land en die ekonomiese sektor as ‘n geheel plaasvind.

“Die sektor moet getransformeer word met die kennis hoe die eindprentjie gaan lyk. Ons (Kabinet) het konsensus bereik om die ontwikkeling van die landbousektor by die kern van die groeiplan van die land te plaas.”

Die departement se sektorplan is onlangs voltooi. Sowat 99% van die belanghebbendes in die landbousektor is tevrede met dié plan, wat as die basis dien vir die sektor se toekomstige transformasie.

Joemat-Pettersson het aangedui dat hulle reeds vir die ekonomiese groeiplan aangedui het hoeveel poste en kleinboere geskep kan word. “Wat positief is van die Kabinet se aanduiding is dat geld op die ontwikkeling van infrastruktuur as eerste prioriteit, en die landbou as tweede prioriteit, bestee sal word.”

Departemente moet nou ‘n reeks planne vir die toepassing van die groeiplan voorlê aan die Kabinet oor die volgende ses maande, met aandag aan die kritieke gebiede waarop die groeiplan fokus. Wanneer die dokument afgehandel is en in die Parlement ter tafel gelê is, sal die Parlement se portefeuljekomitee vir landbou, bosbou en visserye dit ook breedvoerig bespreek.

27 Oktober 2010