Landbou verwelkom sokkerbesoekers

Eet dit, drink dit, dra dit – Suid-Afrikaanse boere produseer dit. Dié boodskap wil die landbousektor oor die volgende paar weke aan die duisende sokkerbesoekers oordra.

Dit is nie net Bafana Bafana wat gereed is vir die wêreld se grootste sportskouspel wat vandeesweek begin nie. In landbougeledere is die vere ook reggeskud om duisende buitelandse besoekers aan Suid-Afrikaanse produkte bekend te stel.

Mnr. Johannes Möller, voorsitter van Agri SA, sê vanjaar se Wêreldbeker-sokkertoernooi is ’n goue geleentheid vir boere in Suid-Afrika om die goeie kos wat hulle produseer, aan die wêreld ten toon te stel.

Hy en mnr. Simon Streicher, uitvoerende hoof van die SA Varkvleisprodusente-organisasie (Savpo), sê in ’n gesamentlike verklaring dit is ook ’n geleentheid om besoekers bloot te stel aan die land se skoonheid en die vriendelikheid van sy mense.

In nog ’n boodskap het die Land boubesigheidskamer (LBK) namens die land se landbou-ondernemings deelnemende spanne en hul ondersteuners in die land welkom geheet. “Ons wyn, vleis, groente, vrugte en ander produkte is alles van wêreldgehalte en besoekers kan dit teen billike pryse geniet. Ons hoop hulle probeer ook ons mieliepap,” het dr. John Purchase, uitvoerende direkteur gesê.

Kyk hier na ‘n videogreep van Möller wat wys hoe mens ‘n vuvuzela blaas en ‘n videogreep van Agri SA wat lekker gees vang vir die Wêreldbeker-sokkertoernooi.

Lees ook:

Sokker bied kans vir sybokhaar

Sokker kan sitrus help

Rooivleis kan by sokker baat

9 Junie 2010