Landwye staking knou vrugte-uitvoer

Die landwye staking van Transnet-werkers het ‘n definitiewe impak op veral vrugte-uitvoere, sê die georganiseerde landbou in die Wes-Kaap in ‘n nuusverklaring deur Agri Wes-Kaap.

Hoewel die uitvoer van druiwe en steenvrugte tot ‘n einde gekom het, is daar steeds groot hoeveelhede kernvrugte wat vir spesifieke uitvoerprogramme aan oorsese kliënte gelewer moet word. Die sitrusseisoen het ook reeds begin en die staking kan nadelige gevolge vir hierdie twee vrugtegroepe beteken.

Volgens mnr. Anton Rabe, uitvoerende direkteur van Hortgro Dienste kan die onderbreking in die sagtevrugte-uitvoere potensiële langtermyn gevolge hê met oorsese kopers. Suid-Afrikaanse uitvoerders moes reeds self inspring om seker te maak dat dié vrugte in die koelhouers op die Kaapse hawe onder die regte temperature geberg word.

Suid-Afrika loop ook die gevaar dat voorsieningsprogramme deur ander lande oorgeneem kan word indien die staking baie langer sloer.

Vrugkwaliteit bly
“Die vertragings behoort gelukkig geen uitwerking op die vrugkwaliteit van appels en pere te hê nie, omdat die opbergvermoë van kernvrugte baie goed is, veral as daar seker gemaak word dat die vrugte onder die regte temperature geberg word,” sê mnr. sê Jacques du Preez, produkbestuurder: kern en steenvrugte by Hortgro Dienste.

‘n Groot bekommernis is die ongunstige uitwerking wat die staking op inkomste kan hê en ook die toename in koste vir skeepsrederye wat op die oomblik in die hawe lê en wag om die produkte te laai. Suid-Afrika loop ook gevaar om sy beeld as bestendige, betroubare verskaffer van vrugte en ander landbouprodukte te skend.

Volgens die statistiek van die NPA (National Ports Authority), is daar gedurende Mei verlede jaar een honderd agt en negentig duisend vier honderd drie en negentig (198 493) metrieke ton vrag in die Kaapstad hawe hanteer, waarvan sestig duisend twee honderd vyf en dertig (60 235) ton uitvoere was.

“Die tydsberekening is baie sleg”, sê mnr. Carl Opperman, hoof-uitvoerende beampte van Agri Wes-Kaap. “Wanneer die staking tot ‘n einde kom, gaan daar ‘n geweldige opeenhoping in onder andere die hawe wees en dít op die vooraand van die sokkerwêreldbeker” Produsente kan ook inkomste verloor indien kopers besluit om hul vrugte van ander kompeterende lande te koop. 

17 Mei 2010