LBK maan oor grondprojekte

Landbou-ondernemings wat by grondhervormingsprojekte betrokke wil raak, moet mooi oor die risiko’s betrokke besin, sê die Landboubesigheidskamer (LBK).

Dr. John Purchase, bestuurshoof, sê dié waarskuwing volg nadat die oorhoofse ooreenkoms rakende transaksies en –prosesse vir grondhervorming, wat die LBK met die Departement van Landelike Ontwikkeling en Grondhervorming sou aangaan, van die baan is.

“Hulle het besluit om terug te gaan na ‘n tenderproses, wat ‘n ander basis is as die basis waarvan ons oorspronklik gepraat het. Ons meen dié verandering hou groter risiko’s in, en dit veroorsaak kommer,” verduidelik Purchase.

Hoe sal die projekte werk? 
Volgens Purchase moet landbou-ondernemings nou aansoeke indien vir tenders om ‘n grondhervormingsprojek te ondersteun.

“Die onderneming gaan egter die meeste geld moet belê, want die departement se deel gaan iets soos 25% beloop. Belangstellendes moet dus baie seker maak wat die voorwaardes is en dat dit tot hulle voordeel gaan wees om betrokke te raak. Maak seker van die projek se sakeplan, en of hy volhoubaar kan produseer. Én die nodig kennis het om suksesvol te wees,” maan Purchase.

Hy sê die eerste van dié tenders sal binnekort in die Vrystaat, Oos-Kaap en Noord-Kaap geadverteer word. “Ek is nie seker hoe die ander provinsies se prosesse gaan werk nie, maar ons neem aan dit sal later geadverteer word.”

Ondernemings met vrae in dié verband word uitgenooi om die LBK by lindie@agbiz.co.za te kontak.

12 Julie 2010