Lindsay Manufacturing stig filiaal in SA

Byskrif:

Mnr. Bruce Karsk, uitvoerende ondervoorsitter van Lindsay Manufacturing, saam met mnre. Sam Haidar, besturende direkteur van Lindsay Africa en Lindsay Europe, en Fredo van Zyl, direkteur: bemarking van Lindsay Africa.

'n Maatskappy wat 'n leier op die gebied van tegnologie-gedrewe besproeiingstelsels is, Lindsay Manufacturing van Omaha, Amerika, het 'n filiaalmaatskappy vir Afrika gestig.

Dit is deel van sy internasionale uitbreidingstrategie wat reeds tot die stigting van Lindsay Europe en Lindsay South America gelei het.

Lindsay Africa se kantoor is in Stikland, Bellville, en die maatskappy gaan volgende jaar begin om een van sy produkreekse plaaslik te vervaardig. Lindsay se verspreidingskanale en sigbaarheid onder boere sal ook uitgebrei word.

Besproeiingsboere in Suid-Afrika is sedert 1976 vertroud met Lindsay se Zimmatic-spilpunte, wat tot nou toe van Amerika ingevoer is. Die plaaslike fabriek sal daarmee begin.

Die maatskappy se ander produkreekse is GrowSmart (beheerstelsels en ander tegnologiese produkte), Greenfield (mini-spilpunte en kruipspuite vir kort gewasse en groente) en Perrot (kruipspuite vir klein gebiede). Die moontlikheid om van dié reekse ook plaaslik te vervaardig, word ondersoek.

Mnr. Sam Haidar, besturende direkteur van Lindsay Africa en Lindsay Europe, sê Suid-Afrika is 'n baie belangrike en groot mark. Die mark vir spilpunte in Suid-Afrika word op sowat 'n 1 000 per jaar geraam, wat net so groot is soos die Europese mark.

Hy sê Lindsay het sy fokus verskuif van die vervaardiging van spilpunte na tegnologie-gedrewe, geïntegreerde water- en plantvoedingbestuurstelsels, wat die doeltreffende gebruik van natuurlike hulpbronne bevorder.

Mnr. Haidar sê die totstandkoming van Lindsay Africa sal die maatskappy nader aan sy klante bring en hom in staat stel om hul behoeftes beter te verstaan en produkte en dienste te verskaf om daarin te voorsien. Dienslewering sal vinniger wees en plaaslike vervaardiging sal pryse mededingender maak, veral omdat verskepingskoste en invoertariewe nie meer hoef betaal te word nie.