LUR in Noordwes wil bande bou

Die Noordwes se LUR vir landbou, landelike ontwikkeling en omgewingsake, mnr. Boitumelo Tshwene, gaan hom beywer om die troebel verhouding tussen Agri Noordwes en Cosatu te verbeter.

Boitumelo Tshwene het tydens die provinsie se plaaswerkerskongres gepraat. Agri Noordwes en Cosatu is sedert verlede jaar in ‘n ernstige woordestryd gewikkel.

“Ons moenie so veg dat ons kinders eendag gaan terugkyk en sê ons was gek om te baklei, eerder as om ‘n nasie te bou nie. As dit gebeur sal ek sê dat nie deel was van die bakleiery nie,” sê Tshwene.

“Almal het mekaar nodig. Plaaseienaars het die tegniese ervaring, terwyl die meeste hande-arbeid op die plaas deur werkers gedoen word.” Tshwene beoog verder om met talle ander provinsiale departemente – vernaam die Departement van Opvoedkunde en die Departement van Gesondheidsorg, te skakel.

Hy sal graag klaskamers op alle plase wil help vestig en ‘n mobiele kliniek op die been bring. Die kliniek kan dan op ‘n daaglikse basis tussen plase toer. Plaasbewoners kwalifiseer ook vir HOP-huise.

“Ons sal eers met grondeienaars moet gesels oor grond wat gekoop moet word en dan kan agri-dorpies gevestig word. Die kwessie sal dus nie gou afgehandel wees nie.”

Lees ook:

Landbouforum vir Noordwes

15 Maart 2010