'Maak plaasmoorde voorrangmisdaad'

Die kans dat ’n boer in ’n plaasaanval kan sterf, is drie keer groter as dié van ’n sekuriteitswag om in ’n transitorooftog te sterf, sê die VryheidsFront Plus.

Luidens ’n nuusverklaring sê die party dié statistiek is volgens ’n verslag van die Regering bepaal.

Mnr. Pieter Groenewald, die party se woordvoerder oor veiligheid, sê dié bepaling is ironies as in ag geneem word dat transito-rooftogte reeds tot ’n voorrangmisdaad verklaar is.

“Ons vra lankal reeds dat plaasmoorde, soos transito-rooftogte, tot ’n voorrangmisdaad verklaar moet word.” Hy sê die party sal volhard in sy pogings.

Onaanvaarbaar
Groenewald sê die moord op mnr. David Hall, ’n boer van Potchefstroom, vroeër vandeesweek is onaanvaarbaar. Hall se vrou is deur die vyf aanvallers aangerand, en buiten hul bakkie is niks tydens die voorval gesteel nie.

“Pres. (Jacob) Zuma sê grondhervorming moet omsigtig gehanteer word omdat dit ’n emosionele saak is. Die werklikheid is dat plaasmoorde nie net emosioneel is nie, maar traumaties ook en ek hoor nie dat Zuma al ooit plaasmoorde veroordeel het nie,” aldus Groenewald.

Volgens Groenewald sal hulle ook boere se veiligheid in die parlement bly bevorder: “Die ANC wil graag voedselsekerheid hê wat deur die boere verskaf moet word, maar hulle gee boere geen sekerheid oor hul veiligheid en grond nie.”

22 Februarie 2012