Malema minste van SA se probleme

Julius Malema, leier van die ANC Jeugliga, en die uitsprake wat hy maak, is die minste van Suid-Afrika se probleme, sê mnr. Justice Malala, ‘n politieke kenner en verslaggewer.

Hy het tydens die Melkprodusente-organisasie se kongres in Johannesburg opgemerk dat geen kommer oor Malema nodig is nie. “Ek dink hy is op pad uit. Hy behoort oor drie jaar op dieselfde plek te wees as waar Peter Mokaba geëindig het,” sê Malala.

Hy het bygevoeg dat hy nie bekommerd is oor uitsprake rakende nasionalisering nie, want hy glo nie dat daar tekens daarvan binne die volgende 20 jaar gesien sal word nie.

Waaroor is kommer nodig?  
Malala is wel bekommerd oor die stabiliteit van instansies in die land, aangesien hy meen daar word met die onafhanklikheid daarvan ingemeng. “Ons moet eiendomreg dophou want ek dink dit word bedreig. Ek is ook bekommerd oor die onafhanklikheid van ons regstelsel. As jy nie ons regters kan vertrou nie, wie kan jy vertrou?”

Die gereelde voorkoms van stakings in die land is ook ‘n kwessie wat aangespreek moet word, meen hy.

SA soos Zimbabwe?
Malala meen nie dat Suid-Afrika ‘n volgende Zimbabwe sal word nie weens een groot verskil tussen dié lande. “Zimbabwe is in die situasie waar hy is omdat een president al vir die afgelope 30 jaar aan bewind is. Ons president bly nie deurgaans dieselfde nie, derhalwe lyk ons pad anders.”

Volgens Malala sal die ANC na die nasionale verkiesing in 2014 weer aan bewind wees omdat die party in 2012 sy 100ste bestaansjaar vier en weens sentiment sal wen.

Ekonomiese vooruitsigte?
Intussen voorspel dr. Roelof Botha, ekonomiese raadgewer vir PriceWaterhouseCoopers, dat Suid-Afrika binnekort ekonomiese herstel sal begin ervaar na die wêreldresessie. “Ek verwag relatiewe lae rentekoerse en inflasiekoerse vir die volgende drie tot vyf jaar,” vertel hy.

Volgens Botha sal die land se groeikoers vir die komende twee tot drie jaar tussen 5% tot 6% per jaar beweeg. “In ekonomiese terme is daar baie stabiliteit en sekerheid in die land, dit verskil egter van die politieke situasie, maar ek voorspel dat dit so sal bly.”

25 Augustus 2010