Mbeki-belofte goeie nuus

Vir Suid-Afrikaanse boere is pres. Thabo Mbeki se belofte om toe te sien dat gesubsidieerde buitelandse landbouprodukte hul bedryf nie skaad nie en min. Alec Irwin se onderneming dat hy Suid-Afrika se landbou aggressief sal beskerm, goeie nuus. Om dié beloftes gestand te doen, gaan egter vasstaan kos.

Die Europese Unie is Suid-Afrika se grootste landbouhandelsvennoot én sy boere word van die ruimste gesubsidieer. Suid-Afrika wil ook sy handel met Amerika uitbrei, maar daar kry die boere 20 % van hul inkomste van die staat.

Pres. Mbeki het in Londen die ryk lande gewaarsku die WHO-samesprekings in Cancun, Mexiko, sal sneuwel as Amerika en die EU, met Frankryk as die voorbok, nie hul landbousubsidies hersien nie.

Ryk lande bestee meer as $311 miljard (sowat R2 364 000 000 000) aan landbousubsidies, twee keer soveel as die waarde van al die landbouprodukte wat ontwikkelende lande uitvoer.

Amerika het sy landbouhulp verlede jaar met 80 % verhoog met die sogenaamde Landbousekerheidswet, maar sedert 1990 sy landbouhulp aan Afrika met 50 % verminder.

Wat intussen groot waarde vir Suid-Afrika se landbou sal hê, is 'n heroorweging van die Regering se houding teenoor die kommersiële landbou. Mnr. Mbeki en sy kabinet sal grondhervorming, arbeidsake, grondbelasting en plaasveiligheid, om net die belangrikstes te noem, só moet bestuur dat voedsel volhoubaar geproduseer word.

Daarvoor is 'n gesonde kommersiële landbousektor waar wit en swart boere saam met sekerheid kan boer, noodsaaklik. Invoertariewe, wat die boere teen die storting van gesubsidieerde produkte moet beskerm, sal ook doeltreffend toegepas moet word.

Indien oënskynlik blindelings voortgestorm word op die pad na 'n soortgelyke krisis as waarin Zimbabwe se landbou hom bevind, sal dit nie help om die speelveld vir Suid-Afrika se boere gelyk te probeer maak nie. Sonder deurdagte bestuur sal die kommersiële landbou kwyn, sal die grondeisers op lappies woongrond verder verarm en die land afhanklik raak van voedselhulp.

25 Julie 2003