Meer geld vir grond nodig - ekonome

Meer fokus vanuit ‘n begrotingsoogpunt op grondhervorming is nodig om die huidige probleme op te los, meen landbou-ekonome.

Mnr. Ernst Janovsky, hoofbestuurder van Absa Agribesigheid, sê die geld wat wel in die Begroting genoem is, is nie genoeg om die groot probleme – wat die afgelope tyd in verskeie media bespreek is – aan te spreek nie. 

Verskeie landboukenners het tydens Absa Agribesigheid se begrotingsbespreking in Johannesburg hul opinies gedeel.

4000 eise vir afhandeling
Mnr. Pravin Gordhan, Minister van Finansies, het in sy begrotingsrede gesê 4000 restitusie-eise is geïdentifiseer is wat in die komende geldjaar afgehandel moet word. “In die lig van die begroting, sou ek meer aandag op grondhervorming en die geld wat bestee moet word, wou gesien het,” sê Janovsky.

Prof. André Jooste, hoofbestuurder van die Nasionale Landboubemarkingsraad, sê sy grootste kommer oor die begroting is dat dié geld vir dié geïdentifiseerde eise nie weergegee is nie. “Veral as ‘n mens in ag neem dat dié departement se grootste probleem sy begroting en tekorte is.”

Landbou se deel
Jooste is ook bekommerd oor die feit dat die begroting wat aan die Departement van Landbou toegewys is, 0,6% van die totale begroting uitmaak. “Ten spyte van die feit dat die geld sowat R2 miljard méér is, is dit steeds dieselfde sny van die koek as wat verlede jaar toegeken is.”

Intussen is Gordhan se aankondiging dat tolpadfooie in Gauteng aansienlik verlaag is – na onder andere 30c per kilometer vir ligte voertuie – gunstig ontvang. Die aanvanklike bepalings vir die toltariewe sou die landbousektor jaarliks tussen R6 miljoen en R8 miljoen ekstra aan vervoerkoste uit die sak gejaag het.

Dr. Hans Bulyamujura, hoofbestuurder van Absa Agribesigheid in Afrika, sê wat die kwessie betref het die Regering “ver gekom. Hulle het die openbare ontevredenheid in ag geneem en nou ‘n plan gemaak om dié tolgelde aanvaarbaar te maak.”

22 Februarie 2012