Meer as 'n miljoen ton kos in Suider-Afrika nodig

Die Verenigde Nasies (VN) se wêreldwye voedselprogram (WFP) raam dat meer as 'n miljoen ton voedsel oor die volgende nege maande in Suider-Afrika versprei sal moet word om 10,2 miljoen mense van 'n hongerdood te red.

Mnr. James Morris, hoof van die WFP, het op 'n nuuskonferensie in Johannesburg gesê die situasie stuur af op 'n grootskaalse menseramp. Sowat R5 miljard is nodig om voedselhulp in Zimbabwe, Malawi, Zambië, Mosambiek, Lesotho en Swaziland te verskaf.

Tot dusver is R1,35 miljard deur skenkerlande bygedra. Mnr. Morris sê selfs met dié geld het die WFP nog 'n tekort van 39 000 ton voedsel om mense in Julie en Augustus te voed. Daarbenewens moet 'n verdere 320 000 ton voor die begin van die reënseisoen in Oktober in die streek versprei word.

Hy sê dit is die WFP se beleid om, sover moontlik, voorraad in die streek te koop. Sover is mielies van Suid-Afrika, Kenia, Uganda, Tanzanië en selfs Ethiopië aangekoop. Amper 30 000 ton is in Ethiopië gekoop, maar probleme word ondervind met die vervoer daarvan.

Mnr. Morris sê mielies kan ook van Suid-Amerika gekoop word. "Ons probeer altyd eers om plaaslik te koop, maar moet ook kyk waar ons die beste pryse kan kry."

Hy sê die WFP aanvaar kos wat aan die gesondheid- en veiligheidstandaarde voldoen van die land waarvandaan dit kom, sowel as die vereistes van die VN se voedsel en landbou-organisasie. "Die land waar die kos versprei word, kan besluit of hy dit aanvaar of nie."

Intussen het die Europese Unie aangekondig dat hy sy hulp aan die hongergeteisterde lande in Suider-Afrika aansienlik gaan uitbrei. Die EU sê hulp van sowat R890 miljoen is reeds aan Zimbabwe, Malawi en Zambië verleen. Dit kan teen die einde van die jaar toeneem tot sowat R1,78 miljard.