Middels kry sterre vir 'vriendelikheid'

"Miskruier-vriendelikheid" is die nuwe geregistreerde handelsmerk van die Universiteit van Pretoria wat aangebring mag word op dieregesondheidsprodukte wat min of geen gevaar vir miskruiers inhou.

In navorsing oor die afgelope paar jaar deur prof. Clarke Scholtz en sy groep medewerkers in die departement dierkunde en Entomologie aan dié universiteit is bevind dat sekere dieregesondheidsprodukte miskruiers vir 'n lang tyd ná die amptelike veiligheidsperk nog wesenlik kan benadeel. Op grond hiervan kon 'n standaard navorsingsprotokol saamgestel word aan die hand waarvan die veiligheid van middels ten opsigte van hul effek op miskruiers wetenskaplik getoets kan word.

Die handelsmerk bestaan uit 'n 3-stersisteem. By produkte wat geen of 'n beperkte invloed op miskruiers het en dus geskik is vir gereelde gebruik, sal 'n 3-sterembleem op die etiket aangebring kan word. Produkte wat geskik is vir ongereelde gebruik sal 'n 2-sterembleem kry en dié wat ongeskik is, een ster.

Klem word geplaas op produkte vir vee in veldtoestande met voorsiening vir spesifieke bestuursaanbevelings. Byvoorbeeld, waar 'n produk as "onvriendelik vir miskruiers beskou word, word dit aanbeveel vir gebruik in voerkrale of by suiwelkuddes.

Die navorsing wat gelei het tot die ontwikkeling van die handelsmerk, is geborg deur die Technology and Human Resources for Industry Programme (THRIP) wat deur die nasionale Departement van Handel-en Nywerheid gefinansier word en deur die National Research Foundation (NRF) bestuur word.

Saam met die ontwikkeling van die navorsingsprotokol wat tot die registrasie van die handelsmerk gelei het, het Novartis Dieregesondheid sy parasietmiddels vir beeste laat toets. Dié produkte sal die eerste in Suid-Afrika wees wat die handelsmerk dra.