Mielie-oorskot onder die loep

Die oorskot van mielies wat tans in Suid-Afrika voorkom en die uitwerking daarvan op boere word volgende week bespreek, sê Solidariteit.

Mnr. Reint Dykema, woordvoerder vir die vakbond, sê die organisasie is die afgelope weke deur boere genader wat graag wil hê dat die kwessie op ‘n openbare platform bespreek moet word.

Volgens die vakbond meen kenners dat die krisis teen die eerste helfte van 2011 ‘n hoogtepunt gaan bereik. 

“Die mielieprys is volgens berigte tans so laag dat boere se produksiekoste nie eers naastenby verhaal kan word nie. Die uitwerking hiervan is dat ‘n geweldige aantal boere volgens berigte teen die helfte van 2011 in ʼn groot finansiële verknorsing kan sit en selfs finansiële ruïnering in die gesig kan staar,” lui die verklaring.

Invloed op gemeenskap
Solidariteit sê hy bied nie die debat aan omdat hy op die terrein van die georganiseerde landbou wil inbeweeg nie.

“Ons belang by hierdie komende krisis is daarin geleë dat ons bekommerd is oor die uitwerking wat dié krisis op diegene  buite die landbougemeenskap van Suid-Afrika sal hê. Die verlede het getoon dat wanneer die landbougemeenskap in ‘n krisis is, die rimpeleffek na die res van die bevolking geweldig groot is. Indien honderde boere bankrot speel weens dié krisis, word plaaslike gemeenskappe op alle gebeide ook in ‘n krisis gedompel,” verduidelik Dykema.

Die TLU SA, Agri SA, Graan SA, die vakbond en prof. Johan Willemse, landbou-ekonoom van die Universiteit van die Vrystaat, sal op 27 Augustus die debat bywoon. Boere word ook genooi om die geleentheid by te woon. Dit word by die Suid-Afrikaanse Onderwysersunie se kantore in Pretoria aangebied.

19 Augustus 2010