Mik meer vir nismarkte

Suid-Afrikaanse mielieboere moet hulle nie blind staar teen tradisionele markte nie, maar moet eerder meer kennis oor nismarkte opdoen en mielies vir daardie markte produseer, het mnr. Dean Fairchild, 'n voorste Amerikaanse grondkundige, gesê.

Daar is meer gebruike vir mielies as bloot menslike en dierevoeding. Dit word al in baie lande vir die vervaardiging van bio-brandstof gebruik, maar nou is daar 'n aanleg in Amerika waar 'n tipe plastiek uit mielies gehaal word. Dit word onder meer in klerasie gebruik en om weggooiborde te maak wat in die natuur kan afbreek.

Baie boere bemark mielies aan fabrieke wat stysel daaruit onttrek. Dus plant daardie boere mielies met 'n hoë styselinhoud.

Dit is dus wenslik om weg te beweeg van die tradisionele keuse tussen wit of geel mielies, en eerder mielies te produseer wat in 'n sekere nismark se behoeftes voldoen. Dit geld nie net die onttrekking van byvoorbeeld stysel of proteïen nie, maar sekere mielies voldoen byvoorbeeld beter aan die behoeftes van 'n hoenderboer of voerkraaleienaar en is dus nóg 'n nismark wat boere kan benut.