Miljoene uit rooivleisheffings?

Die Nasionale Landboubemarkingsraad (NLBR) het bekend gemaak dat hy die aansoek van die Rooivleisbedryfsforum vir die instel van 'n statutêre heffing ontvang het. Dié raad wag nou vir kommentaar tot 15 Maart.

Volgens die NLBR het die forum vir 'n transaksieheffing gevra wat na raming R32 miljoen vir die bedryf sal inbring. Dié geld sal onder meer gebruik word vir versekeringsdienste vir kliënte, asook promosie- en opvoedingsprojekte vir kliënte, navorsing, produksie en ontwikkeling, plaaslike en internasionale skakelwerk, projekte vir nuwe toetreders en bedryfsprojekte.
Ná die sluitingsdatum vir kommentaar, het die NLBR twee maande tyd om 'n aanbeveling aan me. Thoko Didiza, Minister van Landbou en Grondsake, te doen. Sy het wetlik nie 'n spertyd om te reageer nie.
Mnr. Claude Cloete, voorsitter van Wol Suid-Afrika, sê hy kan nie begryp waarom die keerdatum vir die indien van kommentaar en beswaar teen die heffing al voor of op 10 Maart moet geskied nie. "Die Oos-Kaapse Rooivleisprodusente-organisasie, wat hom in die verlede teen só 'n heffing uitgespreek het, se kongres word eers op 31 Maart op Cradock gehou, terwyl dié van die Noord-Kaap ook ná die keerdatum sal plaasvind."
Cloete sê Wol SA gaan beswaar teen die heffing maak. "Dit wil voorkom of daar pogings is om 'n statutêre heffing aan boere op te dwing sonder behoorlike raadpleging op grondvlak."12 Maart 2004