Miljoene vir landbounavorsing

Die Wes-Kaapse departement van landbou gaan vanjaar R63 miljoen net aan navorsingsprojekte spandeer, en hy sal alles in sy vermoë doen om steeds meer geld vir hierdie doel in die toekoms te beding, het mnr. Gerrit van Rensburg, Wes-Kaapse minister van landbou, in George gesê.

Van Rensburg was die genooide spreker tydens ’n inligtingsdag wat by die Outeniqua-proefplaas van die departement buite die dorp gehou is. Hy het gesê terwyl die politiek en makro-ekonomie oorhoofs aanbeweeg, moet boere winsgewend kan boer. En dit is waar die rol van navorsing so belangrik is.

Eerstens skep navorsing beleggersvertroue. Sou boere nie die opsie om in die Kongo met suiwel te gaan boer, soveel sterker oorweeg het as daar reeds ’n gevestigde navorsingsinfrastruktuur bestaan het wat gefokus het daarop? Wanneer ’n regering in navorsing belê, skep dit die beeld van langtermyn-beplanning en stabiliteit, het hy gesê.

’n Artikel het onlangs verskyn wat verwys na ’n verslag oor multi-nasionale firmas wat besig is om in Afrika plantgene te patenteer om dit in die toekoms teen ’n wins te bemark as moontlike antwoord op klimaatsverandering. Die les te leer uit dié tipe internasionale strategiese optrede is dat as “jy nie self op eie bodem navorsing doen nie, jy die gevaar loop om eendag plaaslike kennis by ’n oorsese firma te moet koop”.

Wat die rampfondse vir die 2007-oorstromings betref wat landbouskade van R72 miljoen berokken het, is dié syfer deurgegee na die nasionale Departement van Landbou. Daar is egter afgewyk van die voorgeskryfde prosedure, en die voorlegging wat aan die Tesourie gemaak is, is verwerp.

“Dit is steeds waar ons vandag sit. My departement probeer al die afgelope 18 maande om antwoorde te kry vanaf die Tesourie, maar ek kan vandag steeds nie vir u goeie nuus gee nie. Ons kan net hoop dat die saak weer aandag sal geniet wanneer die aanvullingsbegroting aan die einde van die maand voorgelê word,” het Van Rensburg gesê.

Hy het gesê dit is ironies dat nog met vloedskade gespook word terwyl die Suid-Kaap is van die ergste droogtes in menseheugenis se greep is.

Gelukkig het die land nou weer ’n nasionale minister van landbou wat die kommersiële landbou goedgesind is, en ’n president wat hom uitgee as iemand met ’n oop deur, het hy gesê.

12 Oktober 2009