Min vernuwing in SA uitvoer - Vink

Hoewel die Suid-Afrikaanse landbou ’n uitvoerder van produkte is, raak die land steeds agter by die res van die wêreld.

In die laaste vyf jaar het die uitvoer van Suid-Afrikaanse wyn met sowat 40% gestyg. Dit lyk goed totdat besef word dat Chili se uitvoer van wyn in dieselfde tyd met 300% toegeneem het. Min vernuwing vind plaas in die uitvoerbedryf en onsekerhede oor grondhervorming dra daartoe by, het prof. Nick Vink van die departement landbou-ekonomie aan die Universiteit Stellenbosch (US) op Agri Wes-Kaap se kongres gesê.

Suid-Afrika se markuitvoerbestemmings verander drasties. Uitvoer na Europa krimp, terwyl dit na ander streke, waaronder Afrika, styg, het Vink gesê.

Hy waarsku dat bestaansboerdery vir voedselsekerheid in huishoudings en klein gemeenskappe kan sorg, maar op nasionale vlak rus die verantwoordelikheid op die kommersiële landbou.

Die neiging dat namate ’n land ekonomies groei en ontwikkel, die landbou se bydrae persentsgewys ten koste van ander sektore daal, is ’n teken van ’n gesonde ekonomie, het Vink gesê.

Dit landbou lewer ’n groot bydrae tot die herverdeling van inkomste in ’n ekonomie. Belasting en heffings wat deur die landbou betaal word, word onder meer vir navorsing, inligting en opleiding gebruik.

Lees meer nuus oor die kongres in Landbouweekblad van 13 Augustus 2010.

5 Augustus 2010