‘Minder misdaad' in Gauteng

Die polisie sê misdaad in Gauteng is aan ’t afneem, met Agri SA wat saamstem dat landbou-insidente minder word.

Luidens ‘n berig op Nuus24.com word die afname aan meer sigbare polisiëring op die provinsie se paaie toegeskryf.

Volgens die berig sê veiligheids-, opsporings- en versekeringsmaatskappye dat huisrooftogte, inbrake, voertuig- en vragmotorkapings, diefstal en transitorooftogte het sedert Oktober verlede jaar afgeneem.

Afskrikmiddel
Lt.genl. Mzwandile Petros, Gauteng se polisiehoof, sê: “Die sigbaarheid van die polisie is ’n afskrikmiddel vir misdadigers.”

Brig. Neville Malila, Gautengse polisiewoordvoerder, sê die afname kan ook toegeskryf word aan toegewysde polisievoertuie in woonbuurte en die polisie se fokus op dienslewering en vinniger reaksietye. Volgens veiligheidsmaatskappye Chubb en ADT verskerp mense deesdae ook die veiligheidsmaatreëls by hulle huise.

Lof vir polisie
Intussen is mnr. Andre Botha, voorsitter van Agri SA se komitee vir wet en orde, vol lof vir die polisie se pogings om geweld en misdaad op plase in die provinsie te bekamp.

“Ja, landbou-insidente neem definitief af en al die eer kom aan lt.genl Petros en sy span toe. Ek dink hulle doen wonderlike werk. Huisrowe op kleinhoewes bly nog ‘n probleem, maar daardie gevalle moet mooi gekategoriseer word,” aldus Botha.

Botha sê hoewel sporadiese voorvalle nog voorom, het sigbaarheid ook in die landboudele ‘n rol gespeel. Hy sê die manier wat die polisie die sake hanteer, en patrolering, het verbeter.

Bron: Nuus24.com

17 Junie 2011