M'langa se boere juig oor reën

Reën het verlede week verligting gebring vir boere in Mpumalanga, veral in die sentrale deel. Diegene wat in die lande kon inkom, het begin plant.

Teen verlede Woensdag is tot 100 mm reën op plekke gemeet ná buie sedert verlede Maandag wyd begin uitsak het.

In die gebiede van Ermelo, Amersfoort en Chrissiesmeer tot by Morgenson het van 40 mm tot 100 mm reën geval.

By Bethal is gemiddeld 40 mm reën gemeet.

Lydenburg het 44 mm reën gekry, maar verder Noord na Orighstad en in die berge het dit goed gereën en tot 95 mm het op plekke geval.

In Standerton en Perdekop se omgewing is op plekke sowat 85 mm reën gemeet en by Volksrust 40 mm.

Volgens 'n woordvoerder van Agri Mpumlanga het boere oral verwag dat dit later in die week nog sou reën. Selfs boere op die Hoëveld-rif (Secunda/Kriel) waar dit min (14 mm) gereën het, het in minder ideale toestande begin plant.

By Onderberg en Nelspruit lyk dinge egter nog sleg en geld waterbeperkings. Nelspruit het sowat 12 mm reën gekry, maar geen reën het by Onderberg geval nie en besproeiingtyd is verminder na 12 ure per week.

Wes van Standerton het dit min gereën, met slegs sowat 20 mm op plekke wat die meeste reën gekry het.

Mnr. Riaan van Wyk, voorsitter van Agri Gauteng, sê in die hele Gauteng het toestande nie veel verander nie en het dit slegs kol-kol en min (sowat 8 mm) gereën. Boere hier kon nog niks meer doen as voorbereidings nie. Dit blyk dat soortgelyke toestande in Noordwes en Limpopo ondervind is.

14 November 2003