Niemand het die reg om te sê dat as boere negatief is, moet hulle die land verlaat nie, sê mnr. Johannes Möller, voorsitter van Agri SA.
Tydens ‘n funksie by die Nampo-Oesdag 2012 het hy gesê baie opmerkings word die afgelope tyd gemaak dat boere negatief is, asook dat die landbou negatief is.
Aangaande opmerkings dat boere wat negatief is, die land moet verlaat, het Möller by die Nampo-Oesdag gevra: “Is dit nou ‘n vreeslike positiewe uitspraak? Niemand het die reg om sulke uitsprake te maak nie.”
Lamdbou - kern van mense se bestaan
Volgens Möller is die bedryf deesdae gereeld in die nuus, en dit is nie net weens slegte gebeure of uitsprake nie. “Die landboubedryf raak aan die kern van mense se bestaan. Nie een enkele mens kan deur die dag gaan sonder om met die landbou geassosieer te word nie. Almal is tog afhanklik van voedsel,” aldus Möller.
Möller sê geleenthede soos die Nampo-Oesdag is belangrik vir die voortbestaan van die bedryf. “By sulke geleenthede kan ek as ‘n boer sien wat binne die volgende vyf jaar in die bedryf gaan gebeur.”
Volgens Möller stel dit boere in staat om te sien watter tegnologie beskikbaar sal wees ten gunste van voedselsekerheid en winsgewendheid.
Mnr. Johan Pienaar, adjunk uitvoerende direkteur, sê die bedryf het van 2000 tot 2011 met 8% gegroei. Hy sê hoewel dié groei stadiger is as die groei van ander bedrywe, kan die landbou nie as ‘n klein rolspeler in die land se ekonomie gesien word nie.
15 Mei 2011
