Moenie m

Graan Suid-Afrika het boere gewaarsku om nie vanjaar meer koring te plant as verlede jaar nie.

Mnr. Nico Hawkins, 'n senior ekonoom van Graan SA, sê einde September vanjaar sal die oordragvoorraad na raming 606 000 ton wees. Die 2002/03-seisoen se beginvoorraad was 580 000 ton.

Hy sê tot dusver is geen koring as voedselhulp aan lande in Suider-Afrika gegee nie. Boere moet daarom nie 'n bykomende afsetpunt vir hul koring verwag nie.

Oor die markverwagting vir koring sê mnr. Hawkins dit lyk asof die prys van harde rooi winterkoring op die Kansas-mark in Amerika besig is om te stabiliseer, maar die weer speel tans 'n groot rol. Die plaaslike prys word in 'n groot mate deur dié prys en die waarde van die rand bepaal.

'n Stelsel wat meulenaars sal dwing om invoerkontrakte wat hulle gesluit het, bekend te maak, is nodig om te keer dat hulle boere weer onverhoeds betrap soos wat einde verlede jaar gebeur het, sê mnr. Hawkins. Hy verwag dat die invoertarief binnekort in werking sal tree.

Op die streekvergadering op Moorreesburg het enkele boere weer gekla omdat meulenaars 'n vervoerdifferensiaal gelykstaande aan die vervoerkoste na Randfontein van hul prys aftrek, al is die meulenaar se silo net 'n paar kilometer van die boer se plaas.

Omdat die Wes-Kaap koring na die res van die land "uitvoer" omdat sy produksie heelwat meer is as sy verbruik, behoort boere streng genome net uitvoerpariteit vir hul koring te kry, sê mnr. Hawkins. As dié provinsie se produksie minder as sy verbruik was, sou boere 'n prys gelykstaande aan die invoerpariteit vanuit elders in die land gekry het. Die vrye mark bring mee dat 'n oorskot die prys van die hele oes afdruk.

Mnr. W.T. Myburg, wat op die vergadering as streekvoorsitter uitgetree het, wou van die beswaardes weet hoe besluit gaan word wie se koring bly in dié provinsie en wie se koring word na die res van die land geneem.