Moenie oorboord gaan met biodiesel

Hoewel die sojamark in Suid-Afrika al hoe groter word, moet boere nie oorboord gaan met sojaproduksie nie, veral nie ten opsigte van die SASOL biodieselprojek nie.

Blindelingse produksie sonder voorafberaadslaging met instansies soos Agriocare ('n maatskappy wat by wyse van voorplantkontrakte produsente en verwerkers bymekaar uitbring) kan voornemende en bestaande produsente duur te staan kom. Oorproduksie kan tot oorskotte en gepaardgaande lae pryse, en selfs geen afsetgebiede lei.

So het mnr Patrys Lubbe, besturende direkteur van Agriocare, boere tydens 'n inligtingsdag op Luckhoff gewaarsku. Hy en ander sprekers het boere toegespreek oor die verwagte binne- en buitelandse markte vir soja en oor die voordele van 'n soja-mielie wisselbouprogram.

Lubbe sê Agriocare is reeds in gesprek met verskeie veevoervervaardigers en ook ander maatskappye en hy kan met sekerheid sê daar is 'n groot mark vir sojakoek vir diere- en menslike gebruik. Die SASOL-biodieselprojek, hoewel 'n reuse een met talle moontlikhede (veral vir sojaprodusente in terme van verlangde produksie), is maar nog in 'n beginstadium.

"Daar sal hopelik teen die einde van Junie vanjaar meer duidelikheid daaroor wees. Omdat Suid-Afrika reeds tussen 700 000 ton en 800 000 ton sojakoek per jaar invoer, is soja die logiese antwoord vir die vervaardiging van biodiesel. Jatropha en sonneblomme kan wel ook in die vervaardiging van biodiesel gebruik word. Die volume biodiesel vervaardig per eenheid sonneblom is trouens baie hoër as in die geval van soja, maar die gebruik van sonneblom oliekoek is vanweë sy lae proteininhoud baie beperk. Navorsing sal nog gedoen moet word oor Jatropha omdat die neweproduk in hierdie geval nie geskik is vir dierevoeding nie."

Hy waarsku voornemende sojaboere wat blindelings op die SASOL-biodieselprojek wil spring, dat hulle"hulle vingers gaan verbrand. "Alhoewel die SASOL projek uiteindelik

470 000 ton sojabone sal benodig, is alle aanduidings dat die vraag sistematies tot hierdie omvang sal groei." Pryse gaan ook nie oornag die hoogte inskiet nie. Ons ervaring is eerder dat die binnelandse prys redelik stabiel is. Die afgelope drie jaar het pryse tussen R2000 en R2300 per ton gewissel."

Lubbe bevraagteken mediaberigte waarin boere meegedeel is dat hulle 600 000 ha sal moet verbou om in SASOL se biodieselbehoeftes te kan voorsien. "Dit kan 'n opbrengs van 900 000 ton beteken, dit wil sê 'n surplus van oor die 400 000 ton wat nie sommer deur die SA mark opgeneem sal kan word nie (te veel vir sojaverwerkers)."