Mulder 'sal nooit ANC word'

"Ek is nie ANC nie, en ek sal nooit ANC word nie," het dr. Pieter Mulder, leier van die Vryheidsfront Plus en nuwe adjunk-minister van Landbou, Bosbou en Visserye, op sy gebruiklike besoek aan die Nampo-oesdag buite Bothaville aan joernaliste gesê.

Mulder het in 'n onderhoud die versekering gegee dat hy nie in die Kabinet is om die ANC met die vier VF Plus-setels in die parlement 'n tweederde-meerderheid te gee nie.

Hy het dít duidelik aan pres. Jacob Zuma gestel voordat hy die pos aanvaar het, het Mulder gesê. Hy is die enigste lid van 'n ander party as die ANC en sy alliansie-vennote, Cosatu en die SAKP, in Zuma se nuwe Kabinet.

Mulder het op die Oesdag erken dat dit vir hom 'n groot politieke risiko was om Zuma se aanbod te aanvaar. Hy is egter oortuig van die opregtheid daarvan, dat dit goed deurdag is, en dat daar nie 'n geheime agenda agter skuil nie. Hy meen hy het 'n bydrae tot voedselsekuriteit vir Suid-Afrika te lewer, en dat Zuma hom om dié rede gekies het.

Mulder het ook laat deurskemer dat hy Zuma vooraf ingelig het dat hy nie vir grondsake kans sien nie. Hy verskil steeds heeltemal van die ANC se grondbeleid. Hy het net die pos aanvaar omdat Zuma die twee ministeries geskei het, en omdat hy glo hy kan 'n goeie werksverhouding met me. Tina Joemat-Petterson, die nuwe minister, hê.

Oor Suid-Afrikaanse boere se planne om in die Kongo te gaan boer, het Mulder gesê dit is 'n boodskap aan die Regering dat hy beter na sy boere moet omsien.

Boere wil graag 'n bydrae (tot die opbou van Suid-Afrika) lewer, maar hul goedgesindheid is tot dusver misken, het hy gesê.

15 Mei 2009