Mulder, TLU SA kap Sexwale

Dr. Pieter Mulder, die leier van die Vryheidsfrontplus, het mnr. Tokyo Sexwale, die Minister van Menslike Nedersettings, aangevat oor sy uitlatings teenoor boere.

Dr. Pieter Mulder sê mnr. Tokyo Sexwale, Minister van Menslike Nedersettings, het die afgelope week onbillike uitlatings teenoor boere gemaak. Luidens ‘n berig in Beeld (29 Januarie 2010) het Sexwale aan die Portefeuljekomitee vir Huisvesting gesê baie van die mense wat hulle tans in plakkerskampe bevind, is daar omdat boere hulle van hulle plase afgejaag het.

Sexwale het glo gesê: “Toe die Regering aangedui het dat hy sekerheid van verblyfreg aan plaaswerkers wou gee, toe verjaag baie boere miljoene swart mense van hul grond af. Dié is daardie mense. Waar moes hulle gaan woon?”

Sexwale is onder meer die eienaar van ‘n wynplaas in Franschhoek en het  omstreeks 1998 sowat R105 miljoen betaal vir  Bloemdendal, 'n gesogte wynplaas in Durbanville.

Verskuif blaam
Mulder sê Sexwale is verkeerd as hy boere blameer vir die Regering se onvermoë om verstedeliking doeltreffend te bestuur en om huise aan duisende mense in informele nedersettings te verskaf. “Ek het tydens die onlangse Kabinet-lekgotla my standpunte hieroor gemaak, en ek sal dit weer doen as dit nodig is!”

Volgens Mulder het Sexwale nie alle feite in ag geneem voor hy dié uitlatings gemaak het nie. “Daar is die kwessie van mense wat voor die verkiesing van die Oos- na die Wes-Kaap verskuif is, partykeer tussen 10 000 en 15 000 per maand! Die getal boere het die afgelope paar jaar ook afgeneem van 80 000 na 37 000, dit het ook ‘n invloed op landelike gebiede”. Mulder sê die groot aantal buitelanders wat die afgelope paar jaar die land ingekom het het ook ‘n groot invloed op die aantal inwoners in plakkerskampe.

Kan lei tot plaasaanvalle
Mulder meen sulke uitsprake kan ook lei tot meer geweld in landelike gebiede. “Iemand wat nie die politieke konteks van dié uitsprake verstaan nie kan dit as ‘n rede vir geweld gebruik!”

Hy sê die Regering het die afgelope vyftien jaar groot onsekerheid in plattelandse gebiede geskep met hulle beleidsrigtings teenoor kommersiële boere. Derhalwe meen Mulder dit is onbillik om te verwag dat boere in landelike gebiede moet belê en meer werk moet skep as hulle onseker is oor hulle grond, veiligheid en die voortbestaan van hulle kinders se skole.

“As die Regering hierdie probleme aanspreek sal hulle verbaas wees oor meeste boere se bereidwilligheid om landelike gebiede te help ontwikkel”.

TLU SA verwerp uitsprake
Intussen sê Mnr. Ben Marais, die voorsitter van TLU SA, hy verwerp dié uitsprake van Sexwale. Luidens ‘n verklaring meen Marais Sexwale maak hom skuldig aan ongegronde uitsprake. “Die Regering moet ophou om sake te dryf waarvan die bewyse ontbreek en wat kan lei tot roekelose optrede. As hy nie sy beloftes van huise vir almal kan nakom nie, moet hy heel eerste gaan kyk na sy eie Regering se aandeel daarin, in plaas daarvan om die boere as maklike teiken te blameer vir iets waaraan hulle geen aandeel het nie,” sê Marais.

29 Januarie 2010