Mutual & Federal en AFASA vennote

Mutual & Federal (M&F), ’n lid van die Ou Mutual-groep, het ’n vennootskap met die nuut gestigte African Farmers’ Association of South Africa (AFASA) aangegaan.

Luidens ’n verklaring is dit gegrond op ’n sakeverhouding, maar die versekeraar sal graag betrokke wil raak by inisiatiewe wat opkomende boere sal help om hul bedrywighede na kommersiële boerderye uit te brei.

Die versekeraar het ook deelgeneem aan die stigtingskonferensie van AFASA wat vroeër die maand op Boksburg plaasgevind het.

Mnr. Vusi Ndlovu, die algemene bestuurder van nuwe markte vir M&F, het by die geleentheid gesê: “Mutual & Federal is daartoe verbind om inisiatiewe te ondersteun wat daarop gemik is om die lewe van opkomende boere te verbeter.”

Affiniteitsgroepe

Die maatskappy sê hy is tans besig om verhoudings te bou met affiniteitsgroepe, wat potensiële markte vir opkomende boere se produkte verteenwoordig.

Ndlovu sê die stap sal die maatskappy ook die kans bied om ’n verskil te maak ten opsigte van die Regering se landelike ontwikkelingsinisiatiewe en om maatskaplike ontwikkeling te bevorder. “Ons sal ons toespits op programme wat op opleiding fokus en na maniere kyk om die jeug aan te moedig om ’n loopbaan in die landbou te oorweeg,” aldus Ndlovu.

28 April 2011