Mynregte by Mapungubwe toegeken?

Mapungubwe. Foto: www.wikipedia.com

Sy is bekommerd oor berigte dat mynregte naby die Mapungubwe-erfenisgebied in Limpopo aan Coal of Africa toegeken is, sê me. Buyelwa Sonjica, Minister van Waterwese en Omgewingsake. Luidens ‘n nuusverklaring het die minister via die media verneem dat die mynregte toegeken is.

Mapungubwe is een van sewe wêrelderfenisgebiede in Suid-Afrika en Sonjica is bekommerd dat dié stap die omgewing se wêrelderfenis-status ongunstig kan raak. Die gebied om Mapungubwe het wel nie internasionale erkenning ontvang nie, maar dit word as een van die belangrikste natuurlike omgewings in die land beskou.

Lees ook:

Myne bedreig landbou steeds

Naby aan natuurreservaat
Die geproklameerde gebied is sowat 7 km van die Mapungubwe Nasionale Park af geleë. Die park is nie net as ‘n natuurreservaat geproklameer nie, maar ook ‘n bewarea en ‘n biosfeerreservaat.

Dit nog nie duidelik wat die uitwerking van die mynbedrywighede op die Mapungubwe-omgewing se argeologiese rykdom sal hê nie. Dit sal na verwagting ‘n ongunstige uitwerking op toerisme in die gebied hê.

Vrae aan Shabangu
Die Departement van Waterwese en Omgewingsake het glo ‘n afskrif van die vermeende mynregte van die Departement van Mynwese versoek voordat daar op stappe besluit word. Sonjica is ook van plan om met me. Susan Shabangu, Minister van Mynwese, te vergader om die uitwerking van mynbedrywighede op die hele omgewing te bespreek.

Intussen het Landbouweekblad verlede jaar berig dat Sonjica ‘n aansoek vir die mynregte op die oewer van die Limpoporivier net buite die Mapungubwe gebied, verwerp het.

Luidens dié berig het Mnr. Philippie de Beer, voorsitter van Potgietersrus se distrikslandbou-unie, gesê voortdurende mynboubedrywighede sal die Bosveld binnekort verander in ’n “tweede, vernielde Witbank”.

22 Februarie 2010