Mynskade bedreig Limpoporivier

’n Mynprojek wat deur die Wêreldbank as “gewigtig” ongunstig met “onomkeerbare maatskaplike en omgewingsimpak” geklassifiseer is, word op die walle van die  Limpoporivier beoog.

Die Australiese en Suid-Afrikaanse maatskappy Ledjadja Coal wil ’n oopgroefmyn bedryf wat van só ’n groot omvang is, dat dit nie weer opgevul gaan word nie. Agt plase word geraak en die totale grootte van die projek is ongeveer 8 983 ha.

Die Boikarabelo-steenkoolmynprojek is in vier aansoeke opgedeel. Twee is vir  mynreglisensies, een vir ’n afvalbestuurslisensie en een vir ’n geïntegreerde waterverbruikslisensie. Aansoek om die mynlisensies word in September by die Departement van Minerale Hulpbronne ingedien en die maatskappy wil volgende jaar begin myn.

Die Wêreldbank het dit as ’n ‘kategorie A’-projek geklassifiseer. Dit is projekte wat  potensiële “gewigtige, ongunstige maatskaplike en omgewingsimpakte tot gevolg het wat divers en onomkeerbaar van aard is”.

Volgens sy eie omvangsverslag sê die maatskappy dat die myn as “kwesbaar” beskou kan word weens die feit dat dit so naby aan die Limpoporivier is.

Van die infrastruktuur wat teenaan die Limpoporivier vir die mynbedrywighede opgerig gaan word, is ablusiegeriewe, ’n rioolsuiweringsaanleg, tydelike geriewe vir die opberging van giftige afval, ’n wasaanleg, ’n afvalshoop en besoedelbeherende damme.

Lees meer in Landbouweekblad se uitgawe van 2 Julie 2010.

25 Junie 2010