Nam-skema ‘knou veeboere’

Bees-reliëf. Foto: CHARLES SMITH

Die wêreldwye resessie wat onder meer druk plaas op regerings om kospryse so laag moontlik vir verbruikers te hou, die toestand van verval van Suider-Afrikaanse grensheinings en die impak van die Namibiese veebemarkingskema, is van die vernaamste knelpunte vir die Suid-Afrikaanse veebedryf. Só het mnr. Martin Compion, uittredende voorsitter van die Noord-Kaapse RPO, in sy verslag op die organisasie se kongres in Kimberley gesê. Hy sê genoeg bewyse bestaan dat die Namibiese kleinveebemarkingskema misluk het en boere in Namibië én Suid-Afrika benadeel het. Dié skema het meegebring dat al hoe minder skape in Suid-Afrika geslag word. “Alles dui daarop dat die kwotastelsel hoofsaaklik die Namibiese abattoirbedryf bevoordeel. Boere word benadeel, terwyl verbruikers geen voordeel ontvang nie.” Die goeie nuus is dat daar oor die wêreld heen ’n groter vraag na rooivleis is. Die verbruik van rooivleis het met ongeveer 38% toegeneem. Dié groei vind ook in ontwikkelende lande plaas. Mnr. James Faber van Ulco is as die nuwe voorsitter van die Noord-Kaapse tak van die RPO. 20 Junie 2009